Trumpip Iranimiut umiarsuaat USA-p assersuiffianik qaangeqqunagit mianersoqquai

USA-p præsidentiata Donald Trumpip Iranimiut umiarsuaat USA-p Iranimi umiarsualiviinut mattussineranut qanillippata ingerlaannaq "piuneerutsinneqassasut" ataasinngornermi mianersoqqussutigaa.

Inuit attaveqaqatigiittarfimini Truth Socialimi allappoq.

- Umiarsuit taakkua imaani ikiaroornartulerisunut toqoraanermik iliuuserisartakkatsinnik arlaannaalluunniit qanilligaluarpata ingerlaannaq piuneerutsinneqassapput. Sukkasuumik sakkortuumillu, Trump allappoq.

USA-p sakkutuui ataasinngornermi nalunaaqutaq 16.00 aallarnerfigalugu umiarsuarnik Iranimukartunut Iranimiillu aallarnianit mattussillutik sapaatiummat unnukkut nalunaarput.

Taama USA-p sakkutuuisa qullersaqarfiat, Centcom, sapaatiummat inuit attaveqaqatigiittarfianni X-imi nalunaarpoq. Kingorna nutaamik nalunaarutiginnittoqaqqinngilaq.

Sakkutuut umiarsuarnut nunanit tamalaaneersunut Iranip umiarsualiviinut sineriaanullu tikinnianut aallarnianullu — ilaatigut Persiap Kangerliumarngani Omanillu Kangerliumarngani Iranip umiarsualiviinut tamanut — mattussineq atuutissasoq sapaatiummat nalunaarput.

USA-lli sakkutuui umiarsuarnik Iranimut imaluunniit Iranimit aallartunngitsunik Hormuzip Kangerliumarnganit ikaartitsisinnaapput.

Centcom mattusineq ataasinngornermi atuutilertinnagu paasissutissanik amerlanerusunik saqqummiussisoqarumaartoq sapaammi nalunaarpoq.

USA-p præsidentiata Donald Trumpip umiarsuarnik Hormusip kangerliumarnganiittunik tamanik Amerikamiut sakkutuuisigut matusinissaq sapaatiummat nalunaarutigaa.

Kangerluk taanna nunarsuarmi nukissiuutinik pilersuinermut pingaaruteqarluinnartuuvoq.

Persiap Kangerliumanersuanit immakkut avammut aqqutituaammat nunat soorlu Saudi Arabia, Iran aamma Kuwait uuliamik avammut tuniniaanerannut pingaaruteqartuuvoq.

/ritzau/