Trumpip Issittumut kommissæria: Kalaallit Nunaanni iliuuseqartoqangajalerpoq

USA-p Kalaallit Nunaannut iliuuseqarnissaa „sapaatit akunneri qaammatialuilluunniir“ qaangiuppata pisinnaavoq.

USA-p præsidentiata Donald Trumpip issittumut tunngasunut kommissæria Thomas Dans, Amerikamiut tusagassiuutaannit USA Todaymit apersorneqarluni taama oqarpoq.

Qanoq iliortoqarumaarnissaali erseqqissarneqanngilaq.

- Qimuttuitsunut arlalinnik uneqqaarfissaqartutut takorloorneqassaaq. Pisut sukkasoorujussuusinnaapput, uneqqaarfissaagaluartullu ilaat uniffiginagit apuuffissaq tikinneqalertorsinnaavoq.

- Taama ingerlanissarput præsident Trumpip kissaatigaa - sukkasuumillu ingerlatikkusunneruaatigut, Thomas Dans tusagassiutinut oqarpoq.

Thomas Dans niuernermik suliaqarpoq, Trumpillu præsidentitut qinigaaffiani siullermi USA-p Issittumi Ilisimatusarnermut Ataatsimiititaliarsuani (USARC) siuttuusimavoq.

USARC tassaavoq naalakkersuisoqarfimmit siulersorneqarani ilisimatuussutsikkut ingerlatsiviusoq præsidentimut kongressimullu Issittoq pillugu siunnersuisartoq.

LinkedInimi decemberimi allappoq USARC-mi siulittaasutut toqqarneqarsimalluni, aammali allappoq „Amerikamiut niuernikkut suliffissuaqarnermikkullu soqutigisaat Issittumi sinniisuuffigissallugit“.

Peqatigiiffik American Daybreak, USA-p Kalaallit Nunaatalu attaveqatigiinnerannik annertusaasoq aamma ingerlataraa.

Donald Trumpip Kalaallit Nunaat tiguarusullugu qangali oqaatigisarpaa, qaammatinilu kingullerni Danmarkip, Kalaallit Nunaata USA-llu akornanni pissutsit ilungersunarnerulersimapput.

Danmarkip Kalaallit Nunaatalu USA Det Hvide Husimi pingasunngornermi ataatsimeeqatigissavaat. Tassani USA-p vicepræsidentia J. D. Vance ataatsimiinnermi aggersaasuussaaq.

Naalagaaffeqatigiinnermiit nunanut allanut ministeri Lars Løkke Rasmussen (M) aamma Kalaallit Nunaata nunanut allanut tunngasunut ministeria Vivian Motzfeldt peqataassapput.

Thomas Dans USA Today-mut oqarpoq ilimaginngikkini Trumpip Kalaallit Nunaannik aqutsinissamik anguniagaqarnini taamaatissagaa.

Trumpip siunnersuutigaa USA-p Kalaallit Nunaat Danmarkimit pisiarissagaa, tamannali qallunaanit kalaallinillu itigartinneqartuarpoq.

Amerikamiut atorfilittat kinaassutsiminnik isertuussisut nutaarsiassaqartitsivimmut Reutersimut qanittukkut oqarput, kalaallit Danmarkimit avissaarnissaat anguniarlugu aningaasanik amerlanerusunik tunniussinissaq USA-mi naalakkersuisunit oqaluuserineqartoq.

Oqaloqatigiinnerni inuit ataasiakkaarlugit 10.000 dollarit 100.000 dollarillu akornanni aningaasanik tunineqarsinnaanerat oqaluuserineqarsimavoq.

USA Today naapertorlugu Thomas Dans oqarpoq isumaqaraluarluni Kalaallit Nunaat pillugu isumaqatigiinniarnerit isumaqatigiissuteqarnerluunniit siusinaartumik anguneqarsinnaasut, naatsorsuutigaali pisiarinninnissamut piffissaq sivisunerusoq atorneqarsinnaasoq.

Tusagassiorfik naapertorlugu nangilluni oqarpoq „pissutsit ingerlaannaq aaqqinneqarsinnaasut“.

Taamaakkaluartoq „kalaallit tatigilernissaat tapersersornissaallu piffissartornarlunilu USA-p iliuuseqarnissaa pisariaqassasoq“ oqaatigaa.

Trumpip Kalaallit Nunaannik aqutsiniarluni Amerikamiut sakkutuuinik atuinissani itigartinngilaa.

Taamaakkaluartoq USA Today naapertorlugu Thomas Dans isumaqarpoq „suli ilimanaateqanngitsut, tassami sumiiffimmiilereersimagaanni tiguaaniarnissaq isumaqanngilaq“.

USA Danmark isumaqatigiissuteqarfigereerpaa, qinnuteqarnerinnarmilu sakkutuunik amerlanerusunik inissiisinnaalluni. Maannakkulli sakkutooqarfik ataasiinnaagallarpoq.