Trumpip Kalaallit Nunaat suli kissaatigaa

USA-p præsidentiata Donald Trumpip Washingtonimi kalaallit, qallunaat amerikamiullu ataatsimeeqatigeereersullu oqaatigaa USA-p Kalaallit Nunaat suli piumagaa.

- Qanoq pisoqassanersoq takujumaarparput, pisariaqartipparpulli, atuarfimmi immummik pilersuineq pillugu Det Ovale Værelsemi tusagassiortunik katersortitsinermi oqarpoq.

Aamma erseqqissarpaa USA Danmarkilu attaveqatigiilluartut.

- Isumaqarpunga arlaannik pisoqarumaartoq, Trump oqarpoq.

Præsidentip erseqqissarpaa pingasunngornermi ataatsimiinnerup qanoq ingerlasimanera pillugu suli ilisimatinneqarani, taamaattorli tusagassiortunik katersortitsinerup kingorna ilisimatinneqarumaarluni.

- Ajornartorsiut tassaavoq Danmarki iliuuseqarsinnaanngimmat Ruslandip Kinalluunniit Kalaallit Nunaat tiguarusuppagu, USA-li iliuuseqarsinnaavoq. Tamanna Venezuelamut sapaatip akunnera kingulleq iliuuseqarnitsinni takuneqareerpoq.

- Danmark nammineq illersorsinnaanera naatsorsuutigisinnaanngilara. Qaammatip siuliani qimussimik ataatsimik ilasinissaq oqaluuseraat, pimoorullugulu. Tamannali naammanngilaq, oqarpoq.

Danmarkip nunanut allanut ministeria Lars Løkke Rasmussen aamma Kalaallit Nunaata nunanut allanut tunngasunut naalakkersuisua Vivian Motzfeldt pingasunngornermi Washington D.C-mi USA-p vicepræsidentia J.D. Vance aamma USA-p nunanut allanut ministeria Marco Rubio ataatsimeeqatigaat Kalaallit Nunaat pillugu oqaloqatigiissutiginnillutik.

Ataatsimeereernerup kingorna qallunaat nunanut allanut ministeriata Motzfeldtilu tusagassiortunik katersortitsinermi oqaluttuaraat Kunngeqarfik Danmark USA-lu Kalaallit Nunaat pillugu tunngaviusumik isumaqatigiinngissuteqartut, kisiannili atorfilittat qullersaasut suleqatigiissitaliaannik pilersitsinissaq anguniarneqartoq, aaqqiissutissat anguniarneqassallutik.

- Naatsorsuutigaarput sapaatip-akunnialui qaangiuppata suleqatigiissitat siullermeersumik ataatsimiissasut, Løkke oqarpoq.

Motzfeldt ataatsimiinnermi politikki misigissutsillu pillugit toqqaannartumik oqarsimanerarpoq.

- Ataatsimiinnermi uanga kalaaliullunga, nunatsinniillu aggerlunga, nunatsinni misigissutsit aqqusaakkagut aammalu ukiup ataatsip iluani tatineqaraluttuinnarnerup inuiaqatigiit akornanni ersinermik toqqissisimannginnermillu pilersitsisoq nalaassimanerata ataatsimeeqatigisatsinnut paasitinnissaa pingaartissimaqaara, oqarpoq.

Tamannalu suleqatitta paasisariaqarpaat, Vivian Motzfeldt oqarpoq.

/ritzau/