Trumpip Kalaallit Nunaat tiguarusullugu kissaateqarnini uteqqippaa

USA-p nunami isumannaallisaanissaq eqqarsaatigalugu Kalaallit Nunaat tiguartariaqarpaa.

USA-p præsidentia Donald Trump ataasinngornermi Floridami Mar-a-Lagomi tusagassiortunik katersortitsinermini taama oqarpoq.

USA-p præsidentia taamatut nalunaaruteqarpoq ataasinngornerup unnuaani Jeff Landry, Louisianami guvernøriusoq, USA-p Kalaallit Nunaannut immikkut aallartitaatut toqqareeraalu.

Ataasinngornermi tusagassiortunik katersortitsinermi tusagassiortup aperaa Landry Kalaallit Nunaannut immikkut aallartitatut qanoq inissisimassanersoq, aamma Trumpip suli kissaatigineraa Kalaallit Nunaata Amerikamiut tiguassagaat.

- Angutaavoq pitsassuaq, isumaqatigiinniartartuuvoq. Isumaqatiginninniallaqqissuuvoq. Nunallu isumannaatsuunissaa pillugu Kalaallit Nunaat pisariaqartipparput, Trump oqarpoq nangillunilu:

- Inuiaqatigiit ikitsunnguupput. Aamma naluara Danmark eqqaaneraat, kisianni Danmark aningaasanik pisariaqartitsinngilaq, sakkutooqarnikkullu immikkut illersorsinnaanani.

- Taakku oqarput Danmark ukiut 300-t matuma siorna tikissimasimasut, umiatsiamiugunarpoq. Uagut aamma umiatsiani taakaniippugut, tamanna qularutissaanngilaq. Maanna pisut aaqqiissutissaannik nassaartariaqarpugut, oqapoq.

Donald Trumpip arlaleriarluni eqqasareerpaa USA-p isumannaallisaanermut tunngatillugu Kalaallit Nunaat tiguartariaqaraa.

Aamma siornatigut nunap immikkoortuanik aqutsilernissamut sakkutuunik atuinissaq tunuarsimaarfiginagu oqaatigereerpaa.

Danmarkip naalakkersuisuisa ataasinngornermi USA-p præsidentiata Kalaallit Nunaannut immikkut aallartitamik toqqaanera sakkortuumik isornartorsiorpaat.

- Taama toqqaannera oqaaseqarneralu aalassassutigivara, akuersaarneqarsinnaanngilarlu.

- Kunngeqarfiup oqartussaassusia kunngeqarfiup isumagissavaa, nunanut allanut ministeri Lars Løkke Rasmussen (M) TV 2 Newsimut oqarpoq.

Taassuma USA-p aallartitaa Ken Howery nunanut allanut ministeriaqarfimmut qaaqquniarpaa „killiliiffiginiarlugu nassuiaaqquniarlugulu“.

Ministeriuneq Mette Frederiksen (S) aamma Naalakkersuisut siulittaasuat Jens-Frederik Nielsen ataasinngornermi aamma sakkortuumik qisuariarput.

- Siornatigut erseqqissumik oqaatiginikuuarput. Maanna oqaatigeqqissavarput. Nunat killeqarfii naalagaaffiillu oqartussaassusii nunat tamalaat inatsisaanni aalajangersarneqarsimapput.

- Kalaallit Nunaat kalaallit pigaat, USA-llu Kalaallit Nunaat tiguassanngilaa. Nunat killigisa oqartussaassuseqarnerilu illuatungeriilluta ataqqissagigut naatsorsuutigaarput.

Trumpip Det Hvide Husillu sukumiinerusumik oqaatiginngilaat sooq Landry Kalaallit Nunaannut immikkut aallartitatut toqqarneqarnersoq. Landryp immikkut aallartitaasutut suliassai erseqqissumik aamma oqaatigineqanngillat.

Trumpip siulii isumaqatigiinniarnerni ajornakusoortuni ajornartorsiutinillu aaqqiiniarnermi immikkut ittumik aallartitaqartarsimapput.

/ritzau/