Trumpip oqaaseqartartua: Suleqatigiissitap Kalaallit Nunaata tigunissaa oqaluuserissavaat

Nutarterneqarpoq 18.25 Lars Løkke-mit oqaaseqaatinik. 

Suliniaqatigiit USA-mi Kalaallit Nunaat pillugu ataatsimiinnermi pingasunngornermi pilersinneqartup sapaatip-akunneri marluk pingasullu akornanni ataatsimeeqatigiittassapput "Kalaallit Nunaata tinguarneqarnissaa“ eqqartorniarlugu.

Det Hvide Hus oqaaseqartartua Karoline Leavit tusagassiortunik katersortitsinermini sisamanngornermi ualikkut taamatut ilisimatinneqarsimavoq.

- Ataatsimiinneq naammassilluarpoq. Ataatsimiinneq ingerlalluarpoq. Illuatungeriit isumaqatigiipput suleqatigiissitaliortoqassasoq, Kalaallit Nunaata tiguneqarnissaanut tunngasunik oqaloqatigiissuteqarnermik ingerlatitseqqittussamik, oqarpoq.

Karoline Leavitt pingasunngornermi ataatsimiinneq angusaqarfiulluartutut pitsaasutullu oqaatigaa, nassuiaavorlu "oqarfigineqarsimalluni“ suleqatigiissitat sapaatip-akunneri marluk pingasulluunniit tamaasa ataatsimiittalissasut.

Danmarkimik Kalaallillu Nunaannik oqaloqateqarnerup ingerlateqqinnissaa Trumpip naalakkersuisoqarfiata siunertarigaa, oqarpoq.

Isumaqatigiinnginnertik isumaqatigiissutigaat

Leavitt nangilluni oqarpoq Europami nunat Kalaallit Nunaannut sakkutooqarnikkut ikiuinerat USA-p præsidentiata Donald Trumpip Kalaallit Nunaat pillugu aalajangiineranut sunniuteqarnavianngitsoq.

Karoline Leavitt, Det Hvide Husimi oqaaseqartartoq, sisamanngornermi unnukkut tusagassiortunik katersortitsinermi, taama oqarpoq.

- Kalaallit Nunaannik pisinissamik anguniagaanut sunniuteqarunnanngilaq, oqarpoq.

Danmarkip nunanut allanut ministeria Lars Løkke Rasmussen (M) aamma Kalaallit Nunaata Nunanut Allanut Naalakkeruisua Vivian Motzfeldt pingasunngornermi USA-p vicepræsidentia J.D. Vance aamma USA-p nunanut allanut ministeria Marco Rubio ataatsimeeqatigaat.

USA-mi ataatsimiinnermi isumaqatigiipput illuatungeriit isumaqatigiinngitsut suleqatigiissitaliussasut.

Danskit naatsorsuutigaat sapaatip-akunneri arlaqanngitsut qaangiuppata siullermeersumik ataatsimiissinnaalissasut.

Suleqatigiisitaliap suna qulaajassaneraat suli erseqqissumik ilisimaneqanngilaq. Lars Løkke Rasmussen naapertorlugu suleqatigiissitat atorfilittanit qaffasissumik inissisimasunit ilaasortaaffigineqassapput.

- Præsidentip (Donald Trumpip, aaqq.) isummernini erseqqissarpaa uagullu allatut inissisimavugut. Taamaattumik tunngaviusumik isumaqatigiinngissuteqarpugut, isumaqatigiinngissinnaanerpulli isumaqatigiissutigaarput, nunanut allanut ministeri pingasunngornermi tusagassiortunik katersortitsinermi oqarpoq.

Løkke: Tamanna isumaqatigiissutaanngilaq

Det Hvide Husimit nalunaarutigineqartut naapertorlugit "suli ajornakusoorluinnassaaq“.

Taama oqarpoq nunanut allanut ministeri Lars Løkke Rasmussen (M) sisamanngornermi unnukkut TV 2-mi apersorneqarnermini.

- Isumaqatigiisimanngilagut teknikkikkut suleqatigiissitaliortoqassasoq USA-p Kalaallit Nunaat qanoq pigilersinnaaneraa misissussallugu, Løkke TV 2-mut oqarpoq.

Lars Løkke TV 2-mut nangilluni oqarpoq suleqatigiissitap misissussagaa Amerikamiut Issittumi isumannaatsuunissamik kissaataat “qanoq naaperiarneqarsinnaanersoq”.

Aamma erseqqissarpaa tamanna "killigititaasut ataqqillugit“ pissasoq .

- Tassa taannaavoq isumaqatigiissutigisarput, tamannalu tunngavigisinnaavara. Uanga nammineq ataatsimiinnermi peqataavunga, tamannalu aalajangiusimavarput, nunanut allanut ministeri oqarpoq.