Trumpip siunnersortaa: Kalaallit Nunaata siunissaa pillugu USA-mit sakkutuulersortoqarnavianngilaq

Stephen Millerip, White House-imi pisortap tulliata, Kalaallit Nunaannut sakkutooqarnikkut akuliunnissaq pisariaqarsorinngilaa.

Tamanna marlunngornerup unnuaani CNN-imit apersorneqarnermini oqaatigaa.

- Kalaallit Nunaannut sakkutuulersorluni akuliunnissaq eqqarsaatigineqanngilaq. Kalaallit Nunaat 30.000-inik innuttaasoqarpoq. Apeqqutaaginnarpoq ilumut Danmark pisussaanersoq Kalaallit Nunaannik aqutsisinnaalluni.

Kalaallit Nunaat Danmarkimi naalagaaffeqatigiinni ilaavoq 56.000-illu missaannik innuttaqarluni.

- Arlaannaalluunniit USA-mut sakkutuulersornavianngilaq

Tusagassiortoq aperivoq Millerip Kalaallit Nunaannut sakkutooqarnikkut saassussinissaq ilumut pisussaanngitsutut oqaatigerusunneraa. Pisortap tullia tamatumunnga akivoq:

- Taama eqqarsassalluni taamatulluunniit oqaluuserinnissalluni pissusissamisuunngilaq. Kalaallit Nunaata siunissaa pillugu arlaannaalluunniit USA-mut sakkutuulersorniarnavianngilaq, oqarpoq.

USA-p præsidentiata Donald Trumpip arlaleriarluni oqaatigaa Kalaallit Nunaat USA-mut ilanngukkusullugu.

- USA Natomi pissaanilissuit annersaraat. USA-p Issittoq isumannaatsuutissaguniuk Natollu soqutigisai illersorniarlugit Kalaallit Nunaat USA-mut ilaasariaqartoq erseqqippoq, marlunngornerup unnuaani Miller oqarpoq.

Assiliaq oqallisaaqisoq siammarneqartoq

Millerip nuliata, Amerikami podcastertartup Katie Millerip, Kalaallit Nunaata assinga USA-p erfalasuanik qalipaaserlugu inuit attaveqaqatigiittarfianni X-imi arfininngornermi siammarterpaa.

Assip ataatigut allagartaqarpoq “SOON”-imik, tassa “erniinnaq”.

Trumpip oqariartuutini ataasinngornerup unnuaani uteqqippaa, tassa USA-p nunami isumannaallisaanermut pissutsit eqqarsaatigalugit Kalaallit Nunaat pisariaqartikkaa.

/ritzau/