Trumpip siusinnerusukkut vicepræsidenterisimasaata aningaasaateqarfik assortuussutaasoq isornartorsiorpaa

USA-mi vicepræsidentiusimasup Mike Pencep aningaasaateqarfik akileraartartut aningaasaataannik aningaasalersorneqartoq, inunnik USA-p naalakkersuisuinit malersugaasutut misigisunik taarsiissuteqartartoq, sakkortuumik isornartorsiorpaa.

Mike Pence tusagassiorfimmut NBC-mut taama oqarpoq.

Pence, maanna præsidentiusumut Donald Trumpimut 2017-imiit 2021-mut vicepræsidentiusoq siulleq, aningaasaateqarfik aallaqqaammulli isumassarsiatsialaanngitsoq atorunnaarsinneqartariaqartorlu, oqarpoq.

- Politiinik saassussisimasut imaluunniit januaarip arfernani Kapitolimi aserorterisimasut aningaasanik taarsiiffigineqarnissaannik aaqqissuussisoqarnera ajuallaatigeqaara.

- Republikanerit, Amerikamiullu amerlanersaasa tamanna isumaqarfigigaat, Isumaqarpunga, NBC-mut oqarpoq.

Trumpip naalakkersuisuisa aningaasaateqarfiup pilersinneqarnera maajimi saqqummiuppaat, isumaqatigiissummi tassani Trumpip USA-p aningaaserivianut akileraartarnermullu oqartussaasunut IRS-imut eqqartuussivimmi suliassanngortitsinini unitsippaa.

Trumpimik tapersersuisut amerlasuut 2021-mi januaarip arfernani Kongressimi eqqissiviilliornerup kingunerisaanik eqqartuussivimmut suliassanngortinneqartut oqarsimapput aningaasaateqarfimmit taarsiiffigineqarnissartik qinnuteqarnissartik pilersaarutigalungu.

Aningaasat taakku 1,776 milliardit dollariupput — tassa ukiumut 1776-imut, USA-p tunngaviusumik inatsisaata akuerineqarneranut, assersuutaasumik naleqqiussaallutik.

Eqqartuussisup aningaasaateqarfik sapaatip-akunnerani kingullermi atorsinnaajunnaarsikkallarpaa.

Pence perlulluliortoqarnerata nalaani amerikamiut inatsisartoqarfianiippoq, kingornalu qimarngunneqarluni.

Trumpip aappassaanik præsidentinngornermini inuit 1500-t missaat, politiit naapertorlugit ulloq taanna unioqqutitsisimasimasut, isumakkeerpai.

Inatsisinik atuutsitsinermut ministeriugallartoq Todd Blanche republikanerit senatoriinut qulartunut allagarsiisimasoq, BBC-mi allassimavoq.

"Amerikamiut titusindilikkuutaat naalakkersuisunit naleqqutinngitsumik unioqqutitsinermillu saassunneqarsimasut“, aningaasarpassuit taakku oqarnermini illersorpai.

Aningaasaateqarfik demokratinit republikanernillu isornartorsiorneqarpoq.

BBC naapertorlugu Republikanerit sinnerlugit Senatimi siulittaasoq John Thune aningaasaateqarfik "tapersersorpallaarnagu“ aamma siunertaqanngitsutut isigalugu oqarpoq.

Mitch McConnellip, 2015-imiit 2021-mut Republikanerit sinnerlugit Senatimi siulittaasuusup, tamanna "sianiilliornerulluinnarnerarpaa“.

Kongressimi ilaasortaq Brian Fitzpatrick, Republikaneri Pennsylvaniameersoq, aningaasaateqarfiup atorunnaarsinneqarnissaanik inatsisiliornissamik pilersaaruteqarluni, oqarpoq.

Republikanerilli allat isuma tamanna tapersersorpaat.

"ilisiitsunik malersuineq eqqunngitsoq pissutigalugu, Amerikamiut nunagisartik pillugu isumalluartut pisuussuteqanngitsut hundredelippassuit ukiuni tallimani kingullerni parnaarussaasimasut“, Tommy Tuberville, senatori Alabamameersoq oqarpoq

/ritzau/