Trumpip Ukraine qujasuinnerarlugu pisuutippaa
USA-p Ukrainemut eqqissinissamik pilersaarut saqqummiuppaa, pilersaarut Ruslandip kissaataannaanik imaqartutut isornartorsiorneqarpoq.
Ukrainemi præsidentia, Volodymyr Zelenskyj, oktobarimi USA-p præsidentiata illorsuanut pulaartoq. Amerikami præsidenti, Donald Trump, oqarpoq sisamanngorneq tassaassasoq piffissaq eqqortoq ukrainerit eqqissinissamik siunnersuutimik akuersinissaannut.
Assiliisoq: Handout/Ritzau Scanpix
Amerikamiut præsidentiata, Donald Trumpip, ukrainerit pisuutippai USA-p sorsunneq pillugu iliuuserisaanut qujasuinnerarlugit.
Sapaammi taanna nammineq attaveqatigiittarfimmini, Truth Social-imi, taamak allappoq.
USA-p Ukrainemut eqqissinissamik pilersaarut saqqummiuppaa. Ruslandip kissaataanik isumaqatigiissutissatut siunnersuut imaqartoq isornartorsiorneqarpoq.
Trumpip Ukrainemi præsidenti, Volodymyr Zelenskyj, sapaatip akunnerani tulliuttumi atsioqqullugu piumaffigaa.
- Sorsunneq pisussaanngikkaluartoq kingornunnikuuara. Sorsunneq tamanut ajorsarfiusoq, pingaartumik inuit millionilikkaat pisariaqartinngisaminnik toqutaanerannik kinguneqarpoq.
- Ukrainemi "siuttut" iliuuserisimasatsinnut qujassuteqarnikuunngillat, Europalu Ruslandimit orsussanik ikummatissanik pisiniartuarsinnarpoq, præsidenti naqinnerit angisuut atorlugit allappoq.
USA-p nunanut allanut tunngasunut ministeria, Marco Rubio, sapaammi ullaakkut Genève-mut Schweizimiittumut tikippoq, tassanilu Ukrainemi naalakkersuisut sinniisaannik Europamiillu nunanit arlalinnit sinniisunik eqqissinissamik pilersaarummik oqaloqatiginnikkiartorluni.
Aamma immikkut aallartitaq Steve Witkoff, kiisalu amerikamiut illersornissamut ministeriat, Daniel Driscoll, Genève-miipput. Tusarfiit Reutersimut AFP-mullu paasissutissiipput.
Ukrainemi europamilu siunnersuut ilaatigut imaqarpoq, Ukrainemut USA-mit isumannaallisaatitut qulakkeerinnittoqassasoq, Nato-mut ilaasortat qulakkeerinniffigineqarnerat assigalugu. Tamanna kinaassutsiminnik taasinngitsunit Bloombergimut paasissutissiissutigineqarpoq.
Aammattaaq, aningaasat russit naalagaaffiata pigisaannik tunniunneqatsaaliukkanik, Ukrainemi iluarsaassinermut atorneqarsinnaasut, tusagassiuuteqarfimmit tassannga oqaatigineqarpoq.
EU-mit tusarfiit kinaassutsiminnik ersersitsinngitsut naapertorlugit Sky Newsimut paasissutissiissutigineqarpoq, USA-p siunnersuutaanut akerliusumik Europamit siunnersuusiortoqarsimasoq.
Frankrigip, Tysklandiup Tuluit Nunaatalu sinniisaat aamma sapaatip akunnerata naanerani Genevemi ataatsimiinnernut peqataapput.
Ukrainep suleqatai Europamiut erseqqissaatigaat, eqqissinissamut pilersaarummut suli annertunerusumik suliaqartoqarniartoq, aammalu Ukraine Europalu peqataatinneqassasut.
Ruslandip præsidentia, Vladimir Putin, oqarpoq, pilersaarutip imarisai pillugit oqaloqatigiissuteqarnissamut piareersimalluni. Taassuma aamma sioorasaarutigaa, Ukrainemiut pilersaarut itigartippassuk, sorsunneq Ruslandip februaarimi 2022-mi aallartitani ingerlateqqissagaa.
