Tunumi angallannikkut ajornartorsiutit suli ilungersuatitsipput

Iddimanngiiu Jensen Bianco, Inuit Ataqatigiit, Ineqarnermut, Attaveqarnermut, Isorliunerusunut Upalungaarsimanermullu Naalakkersuisuusoq malillugu, Tasiilap eqqaani helikopterimik sullissinermut tunngatillugu ilungersunartoqarnera Naalakkersuisut eqqummaariffigaat. Tamaanili qulimiguulimmik angallassinermi sullissinissamik isumaqatigiissut atuuttoq pituttuisuuppat 2030-llu naanerata tungaanut atuulluni, maannakkut nutaamik sullissinissamik isumaqatigiissusiornissaq pilersaarutaanngilaq.

Tamanna inatsisartunut ilaasortamut Gerth Mikaelsenimut, Naleqqameersumut akissummi atuarneqarsinnaavoq, taannalu paragraf 37 naapertorlugu apeqqummi Tasiilami Tunumilu sullissinissamik isumaqatigiissutit pillugit Naalakkersuisunut apeqquteqarpoq.

Tunumi angallassinermi ajornartorsiutit piffimmi namminersorlutik inuussutissarsiortunik sakkortuumik eqquivoq, taamaammallu ajornartorsiummut imaannaanngitsumut piaarnerpaamik aaqqiissuteqartoqartariaqartoq, apeqquteqartoq kiisalu Tasiilami sulisitsisut peqatigiiffiat isumaqarput.

Tunu pingaarnerutinneqartoq

Iddimanngiiu Jensen Bianco malillugu Air Greenlandip teknikikkut ilungersunartorsiutit pilersartut iluarsinissaat salliutippaa, ingerlatsinerullu sullissinissamik isumaqatigiissummi sinaakkutit atuuttut iluanni aalaakkaasumik ingerlanneqarnissaa sulissutigalugu, ingerlatseqatigiiffik ilisimatitsivoq.

- Nunatta kangiani angallassinermik sullissinerup nukittorsarnissaa Naalakkersuisut ukkataraat, taamaammallu naalakkersuisoqarfimma maanna pitsannguisinnaanermut iliuuseqarsinnaanermullu periarfissat sorliit isumaqatigiissummut atuuttumut aningasaqarnikkut ingerlatsinermilu sinaakkutit iluanni atorneqarsinnaanerat suliaraat, taanna ilisimatitsivoq.

Naalakkersuisut Nuummit Nuummullu, Kulusummut Islandimullu timmisartuussinerit pillugit isumaqatigiissummik nutaamik siunissami qaninnermi isumaqatiginninniarsinnaanerat, Gerth Mikaelsen ilanngullugu akissutissarsiumavaa.  

Maannakkuugallartorli piffinni taakkunani timmisartuussinernut angallassinissamik isumaqatigiissuteqartoqarsinnaanera pillugu aalajangiisoqanngilaq, Tunumilu angallassinikkut sullissineq Naalakkersuisut pingaartikkaat Iddimanngiiu Jensen Biancop erseqqissaatigaa.

Akissummittaaq Kulusuup, Nuup Islandillu akornanni timmisartuussinermut atatillugu nutaamik angallassinissamik isumaqatigiissusiornermi piumasaqaatit arlallit naammassineqarsimanissaat allassimavoq. Naalakkersuisut naapertorlugit tunngavissat ilaat niuernikkut toqqammaveqartumik imaluunniit maanna isumaqatigiissutip sinaakkutarisaani attuuttumi pisariaqartitat ilaasa naammassineqarsinnaannginnerat ilaapput.

Tasiilami suluusalinnut mittarfik

Tasiilami mittarfimmik sanaartornissamik sulissuteqarnissaq Naalakkersuisooqatigiinnissami isumaqatigiissummi allassimavoq, aningaasanullu inatsimmi 2 million koruuninik misissuinernut pilersaarusiornermilu atorneqartussanik aningasaliisoqarpoq.

Naalakkersuisut Islandimiut timmisartortitseqatigiiffiannik Norlandairimik sullissinissamik isumaqatigiissuteqarput. Sullissinissamik isumaqatigiissut 2020-mi atsiorneqarpoq ullorlu 1. januar 2021 tamanut angallassinermi ukiuni qulini aaqqissuussap ilaatut atuutilerpoq. Timmisartortitseqatigiiffik Nerlerit Inaata Islandillu akornanni timmisartuussinermik isumaginnippoq.

Naalakkersuisut Danmarkimilu naalakkersuisut sinaakkutitut isumaqatigiissutaat naapertorlugu Ittoqqortoormiini nunap immikkoortuani mittarfimmik nutaamik sanaartornissaq sulissutigineqarpoq.

Naammagisimaarinninngitsut

Gerth Mikaelsen Tasiilameersoq, maannakkulli Nuummi najugaqartoq, Naalakkersuisut akissutaannik iluarisimaarinninngilaq. Naalakkersuisut Tunumi angallannikkut pissutsinik ukiuni arlalinni atuuttunik pitsanngorsaaniarlutik naammattumik suliaqanngitsut, taanna isumaqarpoq.

- Naalakkersuisut innuttaasunik namminersortullu angallannikkut pissutsinut tunngatillugu kissaataannik tusaanianngitsut isumaqarpunga.

- Naalakkersuisup ajornartorsiutinik atuuttunik aaqqiissuteqaataasinnaasumik nutaamik sullissinissamik isumaqatigiissuteqarnissamik kissaateqannginnera naammaginngilara.

- Iddimanngiiu Jensen Bianco nammineq Tunumeersuusoq minnerunngitsumik pakatissutigaara, angallannikkummi pissutsinik pitsannguisinnaanera neriuutigisimagaluarparput, taanna oqarpoq.

Gerth Mikaelsen Inatsisartuni Sanaartornermut ataatsimiititaliami ilaasortaavoq, ataatsimiititaliallu suliassaqarfianut angallannikkut pissutsit ilaapput. Tunumi angallannikkut pissutsit ataatsimiititaliami qaqilissallugit, taanna oqarpoq.

Namminersorlutik inuussutissarsiortunik eqquisoq

Jørgen Brønlund Tasiilami namminersortuuvoq VVS aamma OR pigalugit. Taanna Tasiilami sulisitsisut peqatigiiffianni ilaasortaavoq, angallannikkullu ilungersunartorsiorutit piffimmi namminersorlutik inuussutissarsiortunik sakkortuumik eqquisarnera, taassuma tikkuarpaa.

- Atortussiat kingoraartissallu Danmarkimit timmisartukkoortillugit inniminnikkavut ilaatigut Tasiilamut tikinnissaat qaammatini pingasut angullugit utaqqisarpagut.

- Illoqarfimmi ruujorilerinermik ingerlataqarpugut, atortussallu pisariaqartut pisinnaanngikkaangatsigit allatut iliuutsinut utaqqiisaagallartunik aaqqiissuteqartariaqartarpugut, ajornerpaamillu pisoqartillugu tamanna sanaartornermi kinguaattoornermik nassataqartarpoq, taanna oqarpoq.

Tunumut timmisartukkut aqqutit amerlanerusut Nuuk Islandilu aqqusaarlugit Tunumut ingerlasut pilersinneqartariaqarnerat, Jørgen Brønlund malillugu ajornartorsiummut tamatumunnga aaqqiissutaasinnaavoq.