Tupamik imigassamillu atuineq annertusiartortoq
Ukiorpaalunni tupamik atuineq appariartorpoq, maannali killormut saalluni. 2023-miit 2025-mut cigarettit tupallu imusassat 9 procentinik amerleriarsimapput, Naatsorsueqqissaartarfimmit kisitsisit nutaat tamanna takutippaat.
2025-p ingerlanerani tupanik nioqqutissiat 89 tonsit missaat Kalaallit Nunaannut eqqunneqarput.
Toqqorsivimmit: Leiff Josefsen
Innuttaasut tupamik imigassamillu atuinerat Nunatta Karsianut iluaqutaavoq, 2025-mi akitsuutinit katillugit 383 millionit koruunit sinnerlugit isertinneqarsimapput. Tamanna Naatsorsueqqissaartarfiup kisitsisaataasa nutaat marluk takutippaat.
2025-mi tupamik nioqqutissiat 89 tonsit missaat Kalaallit Nunaannut eqqunneqarput, ukiut marluk matuma siorna 81,8 tonsiupput.
Tassa 2025-mi ukiup ingerlanerani 14-ileereersimasut tamarmik ullormut cigarettit 5,4-t pujortarsinnaagaluarpaat.
Aningaasarsiornermut iluaqutaangaartoq
Naatsorsueqqissaartarfik cigarettit peqqissutsimut ajoqutaalluinnartut kræftilersitsisartullu qanoq siammarsimatiginerannik naatsorsuivoq. Ullormut 20-riarluni pujortartarnissaq ilimagigaanni, innuttaasut 27 procentii tupamik pinngitsuuisinnaajunnaarsimapput.
Tupa akitsuuteqangaaraluartoq atuineq annikinnerulersimarpasinngilaq. Tupamut akitsuutit Nunatta Karsianut isertitaqarluartarput, tassani 175,6 millionit koruuninik isertinneqarsimallutik – ukiup siulianut sanilliullugu 4 procentimik qaffariaateqarpoq.
Takussutissaq ataaniittoq naapertorlugu sunoorsinik eqqussuineq marloriaatingajanngorsimavoq.
Aallerfik: Naatsorsueqqissaarfik.
Tupamik atuineq kisimi annertuserianngilaq, aamma imigassamik atuineq taamaappoq.
2025-mi imigassaq 374.000 literi nunatsinnut eqqunneqarlunilu tunisassiarineqarpoq, tassa 11.000 literinik, imaluunniit 2,9 procentinik, amerleriarluni.
Tamanna immaqa annilaarnarpasippoq, ukiulli 30-t kingulliit ingerlaneranni imigassamik atuineq qiviaraanni 27,7 procentimik appariarsimanera takuneqarsinnaavoq.
Aallerfik: Naatsorsueqqissaarfik.
Aalakoornartut suuneranntu kitsisit nikerarput. Tassa immiaaqqat imigassallu aalakoornartullit imerneqaleraluttuinnartut, viinnit eqqunneqartut 508.600 literinit 433.700 literinut appariarsimapput. Imigassaarniarneq 10.000 liiterit missiliorlugit annertuseriarpoq, immiaqqamillu atuineq 440.000 liiterinik qaffariarluni.
Kisitsisit naapertorlugit imigassamut akitsuutit 2025-mi nunap karsianut 1,3 milliardit koruunit missaannik isertitsissutaapput.
