Tusagassiivik: Qarasaasiakkut peqquserluttoq ulluni 21-ni nalunaaquttallu-akunnerini 17-ini innuttaasut nalunaarsorsimaffiannut isersinnasimavoq

Qarasaasiakkut peqquserluttoq septembarip qulinganiit ullut 21-t nalunaaquttallu akunneri 17-it inuit nalunaarsorsimaffiannut isersinnaasimavoq.

Tamanna TV 2-p allagaatinik takunnissinnaanermut tunngatillugu allaaseraa.

Susassaqanngitsulli isersinnaanini inuit nalunaarsorneqarsimasut allaffeqarfiata Danmarkimi paasissutissanik nakkutilliinermut nalunaarutaa naapertorlugu, piffissami tamatumani tamakkiisumik atorsinnaasimanngilaa.

TV 2 naapertorlugu isersinnaaneq 2026-mi septembarip 20-ani — tassa ullut qulit qaangiummata — innarlerneqarsimasoq misissuinerit takutikkaat inunnik nalunaarsorsimaffiup allaffia nalunaarusiami allappoq.

Aatsaalli oktobarip aappaani paasissutissat iserfigineqarsinnaasimanerat paasineqarpoq, isersinnaaneralu unitsinneqarpoq.

Inuit 8,8 millionit missaanniittut atii, najugai aamma inuttut normui susassaqanngitsumit pissarsiarineqarsinnaasimasut Ilisimatusarnermut, Ilinniartitaanermut Digitalimillu Nakkutilliisoqarfik ataasinngornermi nalunaarpoq.

Danskit suliffeqarfiutaat mikisoq nalunaarsuivimmut isersinnaasimasoq oqaatigineqarpoq.

Suliffeqarfik sorleq isersinnaasimanersoq avammut nalunaarutigineqanngilaq. Qarasaasiatigullu atortunik suliaqarfik mikisoq Fynimiittoq suliffeqarfimmit annermit najugaqateqarlunilu piginnittoqartoq, pineqartoq DR-ip nalunaarutigaa.

DR-ip suliffeqarfik sisamanngormalli oqaaseqartinniaraluarpaa, tallimanngornermili ullaap tungaani suli iluatsinngilaq. Taamaammat tusagassiiviup suliffeqarfik sorliunersoq maannamut nalunaarutiginianngilaa.

Akiligassat „aningaasarpassuarnik“ naleqartut oqartussaasunut paasissutissanik taakkuninnga iserfigittoqarsinnaasimaneranik paasisaqarfiusut Mikkel Leihardt, Ilisimatusarnermut, Ilinniartitaanermut Digitalimillu Nakkutilliisoqarfimmi pisortaq, marlunngornermi oqarpoq.

Auliffeqarfiup inatsisinik unioqqutitsinani isersinnaanermini nalunaarsuiffimmi inuup normui 14 millionit missaat ujarsimagai aammattaaq nalunaarutigineqarpoq.

- Taakku suliffeqarfiup atuisartuinit amerlanerupput, suliffeqarfiullu paasissutissat taakku namminneq misissorsimanagit nalunaarutigaa. Taamaammat suliffeqarfiup qarasaasiaqarfiisa atornerlunneqarsimarpasipput, TV2 naapertorlugu inunnik nalunaarsorsimaffiup allaffia Paasissutissanik Nakkutilliisoqarfimmut nalunaarutaani allassimavoq.

Suliffeqarfiit namminersortut, aningaasaateqarfiit peqatigiiffiillu inuit nalunaarsorsimaffianni atit najukkat nalunaarsukkallu pissarsiarisinnaavaat.

Suliffeqarfiit nalunaarsugaasivik aqqutigalugu paasissutissanik ujarlernertik tamatigut akilertarpaat.

Paasissutissat inuit nalunaarsorsimaffianniittut iserfigineqarsimanerisa kingorna paasissutissat isumannaallisaanikkut naammaginanngitsumik illersorneqarsimasut ilisimatusarnermut, ilinniartitaanermut digitalimillu ineriartortitsinermut ministerip Christina Egelundip (M) nassuerutigaa.

Aamma nalunaarsuivimmi isumannaallisaanermut tunngasunik misissuisoqassasoq qinnutigisimavaa.

RITZAU