Tusagassiorfiit: Islamabadimi oqaloqatigiinnerit aallartipput

USA-mit Iranimillu aallartitat, sakkuaakkallarnissamut isumaqatigiissuteqarnermit ullualuit qaangiuttut Pakistaniliarput.

Iranimit aallartitat ulloq 11. april Amerikamiut aallartitaannik vicepræsidentimit JD Vancemik siulersorneqartunik Kangiani qiterlermi sorsunnerup unitsinnissaa pillugu ”pingaaruteqarluartumik” isumaqatiginninniarnissatut pilersaarusiarineqartumut tunngavissat oqaloqatigiissutiginiarlugit Pakistanip ministeriuneranik naapitsipput

Foto: AFP/Ritzau Scanpix

Hanna Hviid Hanna Hviid Hanna Hviid Tusagassiortoq

Saqqummersinneqarpoq 11. Apriili 2026 - 15:42

Annonse

USA-p, Iranip Pakistanillu akornanni oqaloqatigiinnerit Pakistanip illoqarfiisa pingaarnersaanni ISlamabadimi aallartipput.

Taama tusarfik Pakistanimeersoq Reuters naapertorlugu oqarpoq.

Nutaarsiassaqartitsiviup ilanngullugu Iranimiut nutaarsiassaqartitsiviat Fars, oqaloqatigiinnerit aallartissimanerannik issuaaffigaa.

Isumaqatiginninniarnerit matumani pineqarnersut erseqqinngilaq.

USA Iranilu Pakistanip ministeriuneranit Shehbaz Sharifimit Islamabadimut qaaqquneqarput.

Taanna isumaqatiginninniarnerit sioqqullugit nunat taakku marluk akornanni sapaatit akunnerini marlunni sakkuaakkallaarunnaanissaq isumaqatiginninniutigaa.

Sakkuaakkallarunnaarnissaq pingasunngornermut unnuaani nalunaarutigineqarpoq.

Iranimiut aallartitaat tallimanngornermi unnnukkut Islamabadimut tikipput. Taakku Iranimi inatsisisartut siulittaasuannit Mohammad Baqer Qalibafimit nunanullu allanut ministerimit Abbas Araghchimit siulersorneqarput.

Amerikamiut aallartitaat arfininngornermi ullaakkut tikittut, vicepræsidentimit J.D. Vancemit siulersorneqarput.

USA-llu aallartitai Jared Kushner, Donald Trumpip ningaava kiisalu Steve Witkoff aallartitanut ilaapput.

USA Israelilu ulloq 28. februar Iranimut sorsunnermik aallartitsipput. Præsident Donald Trump naapertorlugu Iranip atomimik qaartartorsuaqalernissaata missilinillu ungasissumut igeriunneqartartunik, USA-mut anngussinnaasunik peqalernissaata pinaveersimatinneqarnissaa siunertaavoq.

Sakkuaakkallarunnaarnermut Hormuzip kangerliumaneranik ammaanissamik ilaqarpoq, taanna USA-p Israelillu saassussinerisa kingorna Iranip matuaa. Nunarsuarmi uuliap tallimararterutaa kangerliumanikkoortinneqartarpoq.

USA-p Iranillu akornanni sakkuaakkallarunnaarneq pingasunngornermut unnuaani nalunaarutigineqarpoq. Libanonip isumaqatigiissummut ilaatinneqarnera isumaqatigiinngissutaavoq.

Inatsisartut siulittaasuata Mohammad Baqer Qalibafip Iranip isumaqatiginninniarnissanik aallartitsinissaa sioqqullugu piumasaqaatit marluk naammassineqarsimanissaat tallimangornermi piumasaraa.

Ilaatigut Libanonip sakkuaakkallarunnaarnermut ilaatinneqarnissaa kiisalu Iranimiut pigisaasa nalillit parnaarunneqarallartut atorneqarsinnaanngortinnissaat.