Tusagassiorfik: J.D. Vance Danmarkip Kalaallit Nunaatalu ataatsimeeqatigineranni ilaassaaq
Vivian Motzfeldtip Lars Løkke Rasmussenillu Marco Rubio Washingtonimi Aqagu ataatsimeeqatigissavaat. Præsidentip tullersortaa ataatsimiinnermi aamma peqataasussanngortoq Løkkep maanna nalunaarutigaa.
Præsidentip illorsuani aqagu ataatsimiittoqalerpat J.D. Vance aqutsisuussaaq.
Assi: Pool/Shutterstock/Ritzau Scanpix
Nunanut allanut tunngasunut naalakkersuisup Vivian Motzfeldtip (S) aamma qallunaat nunanut allanut ministeriata Lars Løkke Rasmussenip (Moderaterne), Amerikamiut nunanut allanut ministeriat Marco Rubio aqagu ataatsimeeqatigissavaat.
Lars Løkke Rasmussenip USA-p præsidentiata tullia J.D. Vance aamma peqataassasoq TV2-mut maanna oqaatigaa.
TV2 naapertorlugu ataatsimiinneq J.D. Vancemit aaqqissuunneqassaaq, taamaattumillu Præsidentip illorsuani pissalluni.
- Immitsinnut isigaluta oqaloqatigiilluarnissarput ataatsimiinnerup siunertaraa, taamaattumik oqaaseqaqqissanngilanga, Lars Løkke TV2-mut oqarpoq.
Præsidentip Donald Trumpip Kalaallit Nunaata aqukkusunneranik arlaleriarluni oqariartuutereernerata kingorna Vivian Motzfeldtip Lars Løkke Rasmussenillu ataatsimeeqatiserinnipput.
Nato ataatsimeeqatigineqassasoq
Ataatsimiinnerpassuit pissapput. Vivian Motzfeldtip aamma illersornissamut ministerip Troels Lund Poulsenip Issittumi pissutsit pillugit Nato-p generalsekretæria ataasinngorpat ataatsimeeqatigissavaat.
Illersornissamut ministerip ataatsimiinnissaq piumasaraa.
- Summiffimmiittoqarnerunissaa pisariaqartipparput, ingammik Natomiit, Troels Lund Poulsen oqarpoq.
Bruxellesimi ataatsimiinnissaq pillugu nutaarsiassaq Danmarkip Kalaallit Nunaatalu USA-mut tunngatillugu Nunanut allanut tunngasunut ataatsimiititaliap ataatsimeereeneranni saqqummiunneqarpoq.
Issittumi sakkutooqarnerup annertusarneqarnissaa pisariaqartoq Troels Lund Poulsenip Bruxellesimi ataatsimiinnermi erseqqissarniarsarissavaa.
- Natop Issittumiinnera sumiiffiullu eqqaaniinneranut tunngatillugu soqutiginninnerulernissap Nato-mi oqallisigineqarnissaa ukiuni arlalinni qallunaat pingaartitaaraat, oqarpoq.
Natop avannaarsuata ukkatarinerulernissaa sulissutiginiarpaa, aammali danskit Kalaallit Nunaanni annertusaanissaat neriorsuutigaa.
- Tamatuma saniatigut danskit illersornissaqarfiata Kalaallit Nunaanni ataavartumik annertunerusumillu, aamma nunanit allanit peqataaffigineqartumik, sakkutooqarnissaa sulissutigissagipput ilisimatitsissutiginiarpara, Troels Lund Poulsen oqarpoq.
Illersornissamut ministerip sakkutuut amerlinissaat pillugu qassiussanersut itisilinngilai.
