TUSAGASSIORFIK: Naalakkersuisuq videokkut ataatsimiinnermi uupakaatinneqartoq
Naalakkersuisoq Vivian Motzfeldt naalakkersuisoqarfiullu pisortaa Mininnguaq Kleist russit quiasaarisartuisa videoliaanni uupakaatinneqarlutik peqataatinneqarput. Tusagassiorfik TjekDet allappoq.
Naalakkersuisoq Vivian Motzfeldt videokkut oqaloqatigiinnermmi paasissutissanik tamanit ilisimaneqareersut oqaatigigai, TjekDet allappoq.
Assi: Oscar Scott Carl
Nunanut allanut tunngasunut naalakkersuisoq Vivian Motzfeldt (S) Europami atorfilittat marluk videokkut atatsimeeqatigisoralugit uupakaatinneqarpoq.
Oqaloqatigisaali tassaapput russit quiasaartartut marluk.
Tusagassiorfik TjekDet allappoq
Videoliami, russit tusagassiorfiannit Pravdamit saqqummiunneqartumi, Vivian Motzfeldtip Trumpip sioorasaarineranut Kalaallit Nunaata periaasia aamma Ruslandimut Kinamullu attaveqarneq ilaatigut oqaatigai.
Pravda oqaatsini arlalinni saqqummertarpoq, ilaatigut qallunaatut - uanilu Motzfeldtip immiunneqarnera takuneqarsinnaavoq.
Siusinnerusukkut politikerit qaffasissut uupakaatissimavai
Videokkut ataatsimiinnermut Mininnguaq Kleist aamma peqataavoq, taanna ukiorpassuarni atorfilittaavoq Nunanullu Allanut Ilisimatusarnermullu Naalakkersuisoqarfimmi pisortaalluni.
TjekDet naapertorlugu russit quiasaarisartut Vovan aamma Lexus siornatigut Europami politikerinut uupakaatitsisisarsimapput. Ilaatigut oktobarimi 2023-mi nunanut allanut tunngasunut ministeri Lars Løkke Rasmussen assingusumik videokkut ataatsimeeqatigalugu uupakaatitsipput.
Taamanikkut Lars Løkke Rasmussenip Ukrainemi sorsunneq aamma Ukrainep Ruslandillu akornanni eqqissinissamik isumaqatigiinniartoqarsinnaanera videokkut oqaloqatigiissutigai, isumaqarluni atorfilittanik oqaloqateqarluni.
Videoliaq nutaaq Vivian Motzfeldtip immiunneqarnera minutsit tallimat sinnilaarlugit sivisussuseqarpoq.
Paasissutissat ilisimaneqareersut eqqartorai
Ataatsimiinnerup nalaani quiasaarisartut aappaata Vivian Motzfeldtip kalaallit pisinnaatitaaffiinik sorsuuteqarnera nersorlugu oqaatigaa.
“Ilissi atorfillit akornanni kanngunartuliornernut qitiunersi oqitsuinnaasimanavianngilaq, uagullu Europamiut sapinngisatsinnik tapersersorniarlusilu Kalaallit Nunaata Danmarkillu ataqatigiinnerat illersorniarlugu iliuuseqartariaqarpugut,” videomi oqarpoq.
Vivian Motzfeldtip Rusland Kinalu Kalaallit Nunaannut ulorianartorsiortitsisutut isiginerai russip quiasaarisartup ilaatigut aperaa. Kalaallit Nunaata russit kinamiullu umiarsuaat imartaaniinngitsut akissutigaa, aamma Kinamiut russillu aningaasaliissuteqarsimanngitsut. Tamannarpiarlu Pravdamit issuarneqarpoq.
Vivian Motzfeldt paasissutissanik tamanit ilisimaneqanngitsunik oqaaseqanngitsoq, TjekDet allappoq.
Mininnguaq Kleist, naalakkersuisoqarfimmi pisortaq videoliamilu takuneqarsinnaasoq, suliaq misissorneqaleruttortoq TjekDet-imut oqarpoq. "Angut“ oqaloqatigineqarsimasoq uppernarsarpaa.
TjekDet-ip Vivian Motzfeldt oqaaseqartinnissaa iluatsinngilaa, Sermitsialli naalakkersuisoq suliamut atatillugu oqaaseqartinnissaa sulissutigaa.
