Tusagassiorfik: USA-p illersornissaqarfia Narsarsuaq pillugu paasiniaasimavoq
Sakkutuut amerikamiut naalagaat Narsarsuarmut tikeraarluni mittarfik, umiarsualivik illullu pillugit apersuisimasoq DR allappoq.
USA-p sakkutuuisa naalagaat Narsarsuarmi pissutsit paasiniarlugit tikeraarpoq, tusarfiit arlallit DR-imut oqarput.
Toqqorsivimmit: Leiff Josefsen
USA-p sakkutuuisa illersornissaqarfiata Narsarsuaq immikkut soqutigisimagaa, tassami amerikamiut sakkutuuisa imarsiortut naalagaata nunaqarfik mittarfissualik tikeraarsimavaa. DR.dk allappoq.
Sakkutuut naalagaata mittarfiup qanoq innera, umiarsualiviup eqqaani immap itissusia qanorlu innera aamma unnuiffissat paasiniarsimavai.
Mittarfiup pisortaa Finn Thomsen tikeraarneq pillugu DR-imut ima oqarpoq:
- Umiarsualivik takutipparput. Mittarfiup atornissaanut umiarsualivik itisuujunera pingaaruteqartoq paasiniaasoq isumaqarpoq, mittarfimmi pisortaq Finn Thomsen DR-imut uppernarsaavoq.
Tusagassiivik naapertorlugu sakkutuut naalagaata Københavnimi Amerikamiut aallartitaqarfiat Washingtonimilu oqartussat sinnerlugit tikeraartuuvoq. Tikeraartoqarsimanera amerikamiut aallartitaqarfiata DR-imut uppernarsarpaa.
Allannguinerit annertuut nallilersut
Narsarsuarmi mittarfimmi nunaqarfimmilu tamarmi annertuumik allanngortoqalerfiani amerikamiut soqutiginninnerat paasinarsivoq. Qaqortumi mittarfissap nutaap sisamanngornermi ammarpat Narsarsuarmi mittarfik atorunnaarluni qulimiguulinnut mittarfinngortussaavoq.
Allannguut tamanna suliffissarpassuarnik annaasaqarnikkut nunaqarfimmiillu nutsernermik kinguneqarumaartoq naatsorsuutigineqarpoq.
Amerikamiut soqutiginninnerat pillugu, amerikamiut sakkutuuisa naalagaata Gregory Guillotip Pituffik Space Basemi sakkutooqarfiup saniatigut sakkutooqarfinnut periarfissat allat pingasut isumaqatigiinniutigineqartut Washingtonimi senatimi tusarniaanermi qanittukkut oqaatigaa.
Amerikamiut sakkutuuisa naalagaat: Sumiiffiit pingasut isumaqatigiinniutigerusuppagut
Sakkutuut naalagaat sumiiffinnik aalajangersimasunik taasaqarani ima oqarpoq:
– Danmarki Kalaallit Nunaallu peqatigalugit Kalaallit Nunaanni illersornissamut sakkutooqarfiup allilerneqarnissaa isumaliutigaarput. 1951-imi illersornissaq pillugu isumaqatigiissut naapertorlugu taamaarliorsinnaatitaavugut.
- Sumiiffiit pingasut pillugit Danmarki Kalaallit Nunaallu isumaqatiginiarfigerusuppagut. Pituffik Space Basemi sakkutooqarfimmiinnitta saniatigut sumiiffinni taakkunani annertusaasinnaanerluta, taamaliornikkummi illersuinissamut periarfissatsinnut tapertaassammat, Gregory Guillot oqarpoq.
Narsarsuarmi mittarfik sorsunnersuup aappaata nalaani Amerikamiunit sananeqarnikuuvoq, 1958-illu tungaanut sakkutooqarfiunikuulluni.
