Tusagassiortunik katersortitsineq: Sakkutuulersorluni pissaaneqarniunnissaq ilimananngilaq, sillimasariaqarpugulli

Naalakkersuisut nalunaaqutaq 11.00 tusagassiortunik katersortitsissapput, tassanilu „pissutsit qanoq innerat“ saqqummiunneqassaaq.

Naalakkersuisut siulittaasuat Jens-Frederik Nielsen (D) aamma aningaasaqarnermut akileraartarnermullu naalakkersuisoq Múte B. Egede (IA) tusagassiortunik katersortitsinermi peqataassapput .

Tusagassiortunik katersortitsinermi USA-p præsidentiata Kalaallit Nunaata tigunissaanut tatisiuarneranut tunngasoq eqqartorneqassasoq naatsorsuutigineqarpoq.

Múte B. Egede: Piareersimasariaqarpugut

Jens-Frederik Nielsen (D) tusagassiortunik katersortitsineq aallarnerpaa, kingornalu Múte B. Egede (IA) aamma oqaaseqarpoq.  indleder pressemødet, hvorefter Múte B. Egede får ordet.

Taassuma erseqqissarpaa piffissaq nalaatarput ilungersunarluinnartoq:

- Inuiaqatigiit misigissutsikkut eqqarsartaatsikkullu tamatigut eqqorneqarput. Meeqqaniit utoqqarnut tamatta tamanna misigivarput, nunatta killiffia eqqaaneqaraangat.

- Taamaammat suliniutinik arlalinnik ingerlataqarpugut, oqarpoq.

Múte B. Egede naapertorlugu inuiaqatigiit piffissami qaninnermi piareersimasariaqarput:

- Suli annertunerusumik tatineqarnissarput piareersimaffigisariaqarparput, naak sakkutuulerluni tatisisoqarnissaa ilimananngikkaluartoq, taamaattoq isumatusaartumik piareersimasariaqarpugut nunatsinnik tatisisup isummani suli allanngortinnagu nalunaanngimmat.

- Sakkutuulersortoqarnissaa ilimananngikkaluarpoq, taamaattorli piareersimasariaqarpugut, oqarpoq.

Suleqatigiissitamik pilersitsisoqartoq

Múte B. Egedep nangillugu oqaatigaa suleqatigiissitamik pilersitsisoqarsimasoq, Naalakkersuisullu suliniutinik aalajangiiffigisassanik suliaqartut.

Suleqatigiissitaq naalakkersuisoqarfinnit assigiinngitsunit, politiinit, kommunimilu oqartussanit inuttaqartinneqarpoq.

- Tamakku aalajangiiffigisat siunissami sakkussaassapput, oqaatigineqarpoq.

- Piareersimasariaqarpugut inuiaqatigiillu toqqissisimanissaat anguniarlugu. Naak susoqarnissaa ilimananngikkaluartoq, taamaattoq susussanut tamanut sillimasariaqarpugut, Múte B. Egede oqarpoq.

Ilanngullugu oqaatigaa upalungaarsimanermi sakkussat innersuussutaasut ulluni qaninnerni saqqummiunneqarumaartut.

Innuttaasut sunik naatsorsuuteqassappat?

Tusagassiortut katersortitsinermi apeqquteqartinneqarput.

Sermitsiamit tusagassiortup Naalakkersuisut aperai upalungaarsimanermi aarlerinaat qanoq annertutiginersoq nalilersimaneraat.

Jens-Frederik Nielsenip uteqqippaa sunilluunniit susoqassagaluarpat inuiaqatigiit piareersimasariaqartut, naak susoqarnissaa ilimagineqanngikkaluartoq.

Innuttaasut aamma qanoq iliussanersut, qanorlu naatsorsuuteqassanersut aamma aperisoqarpoq.

Tamatumunnga Múte B. Egede oqarpoq piffissami qaninnermi nalunaartoqarumaartoq.

Uteqqinneqarput naatsorsuutigineqanngikkaluartoq, taamaattoq "illuatungaaniit", matumani naatsorsuutigineqartariaqarpoq USA pineqartoq, iliuusissat suulluunniit piareersimaffigalugillu sillimaffigineqartariaqartut, tassami sakkutuulersornissamik oqarneq suli illuatungilerneqarsimanngimmat. 

Múte B. Egedep ilanngullugu oqaatigaa innersuussutit ilagisinnaagaat innuttaasut ullunut tallimanut nerisassaqarnissaat.

USA suli oqaloqatiginiarneqarpoq

Múte B. Egede oqarpoq USA-mut aqqutit eqqortut atorlugit oqaloqatigiinnissaq suli ingerlanniarneqartoq.

Jens-Frederik Nielsen aamma oqarpoq Donald Trumpip tungaaniit oqaatsit aninneqartut isiginngitsuusaarneqarsinnaanngitsut.

- Nunat tamalaat inatsisaat malitassaallu ataqqineqannginnerat akuerineqarsinnaanngilaq, Jens-Frederik Nielsen oqarpoq nangillunilu Trumpip nunatsinni sakkutooqarnerulernissamik piumasaqarneranik malinninneq "ineriartornerusoq pitsaasoq".

- Nunarput USA-mut akeraanngisaannarnikuuvoq, taamaammat pissutsit maanna atuuttut Naalakkersuisunut ilungersunarluinnarput, Múte B. Egede ilaliivoq.