Tusagassiortussaaleqisoqarpoq – tusagassiortutulli ilinniartunik ukioq manna aallartittoqassanngilaq

Ilisimatusarfimmi tusagassiortunngorniani ukioq manna ilinnialersoqassanngilaq.

Tusagassiortunngorniarusullutik qinnuteqartut sisamaasimasut Inuiaqatigiilerinermik, Aningaasaqarnermik Tusagassiornermillu Ilisimatusarfik Instituttimi pisortap Annemette Nyborg Lauritsenip oqaatigaa. Taakkunanngali marluinnaat ilinniarlutik aallartikkusussimapput, ilinnialersussallu aappaa saniatigut tamakkiisumik suliffeqarluni.

Taamaammat ilinnialersussat peqatigiissinnaanerat ilikkagassaallu eqqarsaatigalugit ilinniaqatigiinnik nutaanik aallartitsisoqarsinnaasimanngilaq.

- Ilinniartoq ataasiinnanngikkuni marluinnaassappata ilinniaqatigiinnik aallartitsinissaq illersorneqarsinnaanngilaq, Annemette Nyborg Lauritsen oqarpoq.

Tusagassiortunngornianik nutaanik aallartittoqassappat ilinniartut ikinnerpaamik qassiunissaat aalajangerneqarnikuunngilaq. Ilinnialersussalli peqatigiilluarsinnaasut pingasuniit tallimanut amerlassuseqartuuppata aallartitsisoqarsinnaagaluartoq instituttimi pisortaq oqarpoq.

- Ikinnerpaaffiliinikuunngilagut. Kalaallisulli oqaasilinnik tusagassiortoqarnissaa pingaarteqaarput. Taamaammat aallartittoqartussaannginnera ajuusaarutigeqaarput, taanna oqarpoq.

Tusagassiortussaaleqiuartoqarpoq

Tusagassiortunngorniarusullutik qinnuteqartut amigaataaginnanngillat, nunatsinnimi ukiuni arlaqalersuni tusagassiortussaaleqisoqarpoq.

Tusagassiorfiit tusagassiortunik ilinniarsimasunik atorfinitsitsinissaq unammillernartippaat, ingammik tusagassiortut kalaallisut oqaasillit amigaataapput.

Taamaammat ilinnialersussanik aallartittoqartussaannginnera Annemette Nyborg Lauritsenip uggoraa.

- Kalaallisummi oqaasilinnik tusagassiortoqarnissaa pingaartikkaluaqaarput, taanna oqarpoq.

Qinnuteqartut sooq taama ikitsigisarnerannut suna peqqutaanersoq misissorsimanngilaa, tusagassiornerulli nunarsuaq tamakkerlugu tatisimaneqaleraluttuinnarnera peqqutaaqataasinnaasutut tikkuarpaa.

- Tusagassiorneq, paasisakka malillugit, nunarsuaq tamakkerlugu ajornartooqqavoq. Inoqatinut attaveqaatit, influencerit, silassorissuusiaq teknologilu nutaaq peqqutaaqataannguatsiarput, Annemette Nyborg Lauritsen oqarpoq.

Qinnuteqartut ikippallaartarnerat misissuiffiginiaraat

Tusagassiortutut ilinnialerusullutik qinnuteqartartut sooq taama ikitsiginerat Ilisimatusarfiup misissuiffigerusuppaa.

Instituttimi studieadjunkti misissuisinneqarsinnaasoq periarfissatut Annemette Nyborg Lauritsenip taavaa. Inuusuttut sooq tusagassiortunngorniarusuttannginnerat, aamma ilinniarneq qanoq iliorluni pilerinarsarneqarsinnaanersoq misissuinermi ilanngunneqarsinnaallutik.

Ilinniarnertuunngorniarfinni ilinniartut ornillugit tusagassiornerup iluani periarfissanik oqaloqatigiartorneqarsinnaaneri Ilisimatusarfimmiit eqqarsaataannut ilaavoq.

Annemette Nyborg Lauritsenimmi inuusukkallarami pisut allaalluinnarneri eqqaamavai.

- Tusagassiortunngorniarneq inuusukkallarama ilinniakkanut nuannarineqarnerpaanut ilaanikuuvoq, allaat tusagassiortutut ilinnialernissaq ajornarluni. Ullumikkulli pissutsit allarluinnaapput, taanna oqarpoq.

Annemette Nyborg Lauritsenip oqarnera naapertorlugu Ilisimatusarfimmi ilinniarfigineqarsinnaasuni Tusagassiornermut Immikkoortortaq kisiartaalluni ilinnialersussanik nutaanik ukioq manna aallartitsissanngilaq.