Tuukkaq suli ajoquteqartoq – utaqqiisaarutaagallartumik timmisartoq atorneqartussaq tallimanngornermi tikisinneqarpoq
Air Greenlandip timmisartua Tuukkaq teknikkikkut ajornartorsiuteqarmat Københavnimi ullup aappassaa uninngaannassaaq. Timmisartuutileqatigiiffik Privilege Style tallimanngornermiit timmisartuussinerit tigungallassavai.
Ulluni makkunani Tuukkaq Spaniamiut timmisartuannit paarlanneqarallassaaq, taannalu tallimanngornermi arfininngornermilu Kalaallit Nunaata Danmarkillu akornanni timmisartuussissaaq.
Privilege Style tusagassiutilerinermut assiutaat
Timmisartorsuup Tuukkap teknikkikkut ajoquteqarnera Københavnimiit Nuummut tallimanngornermi timmisartuussinissaa sioqqullugu aaqqinneqanngitsoorpoq. Air Greenlandimit Sermitsiamut uppernarsarpaa.
Ajornartorsiulli pissutigalugu tallimanngornermi timmisartuussineq taamaatiinnarneqanngilaq, soorlu sisamanngornermi taamaattoqartoq. Timmisartoq spaniamiunit Privilege Stylemit pigineqartoq taarsiullugu atorneqartussanngortoq nalunaarutigineqarpoq, taamaattumillu ilimagineqarpoq ilaasut amerlanersaat pilersaarutit malillugit tallimanngornermi tikissinnaassasut.
Spaniamiut Airbusiat Kalaallit Nunaannit pigineqartumit ikinnerulaartunik ilaasoqarsinnaanera pissutigalugu ilaasussat ilaasa arfininngorneq utaqqisariaqassavaat, ullormimi tassani Privilege Style timmisartuusseqqissaaq. Sisamanngornermi timmisartuunneqanngitsoortut ilanngullugit angallanneqassapput.
Teknikkikkut ajornartorsiut tassaavoq Tuukkaap atortua taarsertariaqalersimanera.
Aammattaaq allannguutit pissutigalugit aqqutaani akitsuuteqanngitsumik tuniniaasoqassanngitsoq, Air Greenland ilaasunut eqqugaasunut taama nalunaaruteqarpoq.
