Ujaasineq iluatsilluartoq — tuttunniartut maqaasineqartut ajunngitsut nassaarineqarput

Politiit sisamanngornermi Aasiaat eqqaani ujaasinermik aallartitsipput. Pigaartut pisortaat Jeppe Andsager taama oqaluttuarpoq.

Ujaasineq ernumasoqarnera tunngavigalugu aallartinneqarpoq, tamannalu sisamanngormat ualikkut nalunaaqutaq tallimat missaanni politiinut nalunaarutigineqarpoq.

Angutit marluk tuttunniareerlutik utersimanngillat. Taakku marluk pingasunngornermi utertussaagaluarput, utersimanngillalli.

Aallaqqaammut Aasiaat Radioatigut Pan Pan-imik taaneqartartoq aallartinneqarpoq, politiillu angallataat Aasianniittoq aallartinneqarluni.

Aamma qulimiguulimmik ujaasisoqarnissaa piumasarineqarpoq.

- Qulimiguulik qangattartorlu inuit attaveqarfigineqarput, Jeppe Andsager oqaluttuarpoq.

Angutit marluk taakku Attumi orsersorniarlutik umiatsiaminni ajunngitsut attaveqarfigineqarput.

Tuttunniartut marluk tallimanngornerup unnuaani nalunaaqutaq 02.00 missaani attaveqarfigineqarput.