2025-mi januaarip arfineq-aappaanni timmisartoq Nuummut mippoq.
Sioraani allaqqavoq TRUMP, paavanilu Amerikamiut erfalasuat
takuneqarsinnaalluni.
Timmisartumit Amerikap præsidentiata ernera Donald Trump Jr. niuvoq.
2025-mi januaarip arfineq-aappaanni timmisartoq Nuummut mippoq.
Sioraani allaqqavoq TRUMP, paavanilu Amerikamiut erfalasuat
takuneqarsinnaalluni.
Timmisartumit Amerikap præsidentiata ernera Donald Trump Jr. niuvoq.
Tikeraarneralu Kalaallit Nunaanni ulluinnarni inuunermut allannguerujussuarpoq.
Trump juniorip Nuummi aqqusinerni angalaarneraniit ukioq ataaseq qaangiussimalerpoq. Ukiumi kingullermi Kalaallit Nunaata Trumpillu akornanni pisut kingulliillu pillugit uani paasisaqarsinnaavutit.
Januaari 2025
2025-mi januaarip arfineq-aappaanni Trump juniori takornariatut Nuummut tikeraarpoq.
Januaarip arfineq-aappaat. Præsidenti Donald Trump Floridami tusagassiortunik katersortitsivoq, tassanilu oqaatigaa Kalaallit Nunaat tiguniarlugu sakkutooqarnikkut aningaasatigullu pinngitsaaliilluni iliuuseqarsinnaalluni.
Januaarip qulingat. Naalakkersuisut siulittaasuat Múte B. Egede (IA) Københavnimi tusagassiortunik katersortitsinermi oqarpoq: "Qallunaajussanngilagut, amerikamiuussanngilagut kalaalliuvugut.“
Marsi 2025
2025-mi marsip qulingat. Inatsisartunut qinersinissaq aqaguttoq Trump inuit attaveqaqatigiittarfianni Truth Socialimi allappoq USA Kalaallit Nunaanni dollarinik milliardilinnik aningaasaliinissamut kalaallillu pisuunngortinnissaannut piareersimalluni.
15. marsi 2025. Kalaallit hundredellit Nuummi, Sisimiuni Qaanaamilu akerliussutsimik takutitsipput Donald Trumpip Kalaallit Nunaannik tiguaaniarluni oqaaseqarneranut akerliullutik.
marsip 15-ianni Amerikamiut Kalaallit Nunaannik tiguaaniarlutillu aqutsiniarnerannut akerliussutsimik takutitsisoqarpoq.
Assi: Oscar Scott Carl
Marsip 25-at 2025. USA-p vicepræsidentia J.D. Vance nulianilu Usha Vance Pituffimmi sakkutooqarfik tikeraassallugu nalunaarput. Usha Vance Nuummut Sisimiunullu angalasussaagaluarput Avannaata Qimussersua najuuffiginiarlugu. Amerikamiut tikeraarnissaat Naalakkersuisunngortussat suli inissinngitsiartut pinissaa isornartorsiorneqarpoq, akerliussutsimillu takutitsinissamik nalunaaruteqartoqareernerani tikeraarnissamut pilersaarutit allanngortinneqarput.
2025-mi marsip 28-at. Ulloq taanna Naalakkersuisut nutaat Jens-Frederik Nielsenimik (D) siuttuuffigineqartut Nuummi saqqummiunneqarput, J. D. Vancelu Pituffimmi sakkutooqarfimmi tusagassiortunik katersortitsivoq, tassanilu oqarpoq Danmark ukiuni kingullerni Kalaallit Nunaannut aningaasaliivallaarsimanngitsoq.
Apriili 2025
2025-mi apriilip ulluisa 29-anni, USA-mik ajornartorsiuteqangaarfiusumi kunngi Frederik Nuummut tikeraarpoq, ilaatigut Jens-Frederik Nielsen kangerlummi umiatsiamik angalaqatigaa Katuamilu tamanut ammasumik kaffillerluni.
Kunngi Frederik Jens-Frederik Nielsenilu Nuummi mittarfimmi
Assi: Oscar Scott Carl
Juuni 2025
Juunip 15-at 2025. Frankrigip præsidentia Emmanuel Macron Kalaallit Nunaannut tikeraarpoq, tassanilu Jens-Frederik Nilsen aamma Mette Frederiksen peqatigalugit Nuummi tusagassiortunik katersortitsilluni. Tassani oqarpoq: "Frankrig europamiullu tamarmik isumaqarput Kalaallit Nunaat tiguarneqarsinnaanngitsoq.“
Aggusti 2025
2025-mi aggustip 18-ani. Tysklandip illersornissamut ministeriata tullia Nils Schmid Nuummut tikeraarpoq. Danmarkimi illersornissamut ministeri Troels Lund Poulsen aamma nunanut allanut tunngasunut naalakkersuisoq Vivian Motzfeldt (S) ataatsimeeqatigai.
Illersornissaqarfik Kalaallit Nunaanni aggustimi ulapittupilussuuvoq, ilaatigut NATO-mut ilaasortat arlallit peqatigalugit sungiusartoqarluni.
December 2025
2025-mi decembarip arfineq-pingajuanni. Kalaallit Nunaata, Danmarkip USA-llu akornanni Joint Committee aamma Permanent Committee Nuummi ataatsimiipput. Amerikamiut aallartitaat Ken Howery tusagassiortunik katersortitsinermi oqarpoq USA-p kalaallit siunissamik namminneq aalajangiisinnaatitaanerat ataqqillugu.
2025-mi decembarip 22-anni Trumpip Louisianap guvernøria Jeff Landry USA-p Kalaallit Nunaannut immikkut aallartitatut toqqarpaa.
Januar 2026
2026-mi januaarip tallimaani Jens-Frederik Nielsen tusagassiortunik katersortitsinermini oqarpoq ernumasariaqanngittugut, aamma Naalakkersuisut “aqqutit eqqortut” atorlugit USA oqaloqatiginiaraat.
- USA-p præsidentiata Kalaallit Nunaat pillugu ilungersorluni iliuuseqarusunnini erseqqissarmagu NATO-mi suleqatitta tapersersuinerat pingaaruteqarluinnarpoq, Jens-Frederik Nielsen oqarpoq.
Assi: Oscar Scott Carl
Januaarip tallimaat 2025. Europami siuttut arlallit EU-mi ilaasortaasut Kalaallit Nunaannut Danmarkimullu tapersersuipput.
Januaarip arfernani Folketingimi nunanut allanut tunngasunut ataatsimiititaliaq immikkut ittumik ataatsimiippoq, oqaluuserisassarlu ataaseq eqqartorneqarpoq: Kunngeqarfiup USA-mut attaveqarnera.
Januaarip arfineq-aappaat 2026. USA-p nunanut allanut ministeria Marco Rubio nalunaarpoq Kalaallit Nunaat pillugu Danmark ataatsimeeqatiginiarlugu. Vivian Motzfeldtip Sermitsiamut uppernarsarpaa ataatsimiinnermi peqataajumaarluni.
