Ukiorpassuarni misissuineq: Tunumi nannunniartarneq nungusaataanngilaq pisassallu amerlineqarsinnaallutik
Tunumi nannunniartarneq nungusaatanngimmat ernummataanani ingerlaannarsinnaavoq, aamma pisassat malunnaatilimmik amerlineqarsinnaasut ilisimatusartoq naliliivoq.
Pinngortitaleriffimmiit Tunumi timmisartumiit nannunik kisitsinerit annerpaartaat 2023-mi upernaakkut ingerlanneqarpoq. Piniartut qaammataasiamiillu assilisat iluaqutigalugit nannut 2.364-it missaanniittut naatsorsorneqarput.
Toqqorsivimmit: Themo Benjaminsen
Tunumi nannunniarnissamut ilisimatuussutsikkut innersuussutit siulliit, ukiorpassuarni misissuinernit tunngavillit, saqqummiunneqarput.
Pinngortitaleriffik nittartakkamini paasissutissiivoq.
Nannuttassiissutit 60-it missaanniittut piujuartitsinermik qulakkeerinnittoq Pinngortitalerimmiit naqissusiipput, aamma periutsit aalajangersimasut malinneqarpata amerlanerulersinneqarsinnaallutik:
- Annikitsuinnarmik nakkutiginnittoqarpat ukiumut nannut 66-it pisarineqartarnissaat piujuartitsiniarnerussaaq. Ilisimatuussutsikkullu nakkutilliilluni misissuisoqartarnissaa annertunerutissagaanni taava nannuttassat 83-inut qaffaaffigineqarsinnaassapput.
- Nannut misissuiffigineqarnissaat pinngitsuussappat taava kingusinnerpaamik 2040-mi nannuttassat ukiumut 60-it pisarineqarsinnaanngussapput.
Ilisimatusartoq: Isumaqatigiissutinut naammassinninnerput uppernarsarsinnaanngorparput
Innersuussutit nutaat pingaaruteqartut Fernando Ugartep Sermitsiamut itisiliilluni oqaatigaa. Kalaallit Nunaannimi tamarmi nannunniartarneq piujuartitsinermik aallaaveqarnera siullermeerluni uppernarsarneqarsinnaalermat:
- Kitaani Qaanaamilu piujuartitsisumik piniarnerup ilisimatuussutsikkut maannamut uppernarsarsinnaanikuusimavavut, Tunumili ilisimasat amigaatigalugit. Nunanili tamalaani isumaqatigiissutivut maanna naammassisimanerat uppernarsarsinnaalerparput.
- Aammattaaq Tunumi piujuartitsinermut periusoq unioqqutinngikkaluarlugu pisassiissutit amerlinissaannut periarfissaqarpoq, Fernando Ugarte Sermitsiamut allakkatigut akissuteqarluni nassuiaavoq.
Kisitsinerup inernera tupaallaatigaajuk?
- Tunumi nanorpassuaqartoq ilisimareerparput, taamaattumik piniarneqartarnerat piujuartitsisumik tunngaveqarnera tupaallaataavallaanngilaq, ilisimatusartoq oqarpoq.
Nannut 250-it ilisimajunnaarteriarlugit nalunaaqutserneqartut
Piniartut nannut ingerlaartarfii silallu allanngoriartorneranut tunngasut misilittagaat aallaavigalugit misissuiffissat sumiinnissaat pilersaarusiorneqarlunilu aalajangersorneqarnikuusoq, Fernando Ugarte paasissutissiivoq.
Aamma ukiuni 2015-imiit 2022-p akornganni nannut ilisimajunnaartinneqariarlutik, nalunaaqutserneqartarsimapput ilisimatusartuniillu misissorneqarlutik.
Misissuinerit inernerisa piniartullu misissugassatut tigusiffiginneriarlutik nassiussataasa takutippaat, Tunumi nanoqatigiiaanik immikkoortunik marlunnik peqartoq: kujasinnerusortaani nanoqatigiiaat ikinnerusut taavalu Tunup sinnerani nanoqatigiiaat piniartut Tasiilami Ittoqqortoormiinilu inuussutigisaat, Fernando Ugarte allappoq.
Nannut 2.000-it sinnillit
Taamatuttaaq Pinngortitaleriffiup Tunumi timmisartumiit nannunik kisitsinerit annerpaartaat 2023-mi upernaakkut ingerlappaa. Taakkua saniatigut piniartunik ikiorneqarnikkut satellitsikkullu nalunaarsuutinik pissarsiaqarnermigut nanoqassusaa 2.364 missaanniittutut nalilerneqarpoq.
Kujataanilu ukiumut nannuttassat qulit missaanniittut amerlisinneqassappata taava Tunumi pisassat appartinneqarnissaat pisariaqassasoq, ilisimatusartup aamma eqqumaffigeqquaa.
