Ukiortaami anguniakkat nutaat: Anguniakkat ukuupput

Bolatta Silis-Høegh, eqqumiitsuliortoq:

Ukiortaami anguniagaqartarpit – imaluunniit imminut salloqittaanertut pisariaqanngitsutut isigisarpiuk?

- Ukiortaami anguniagaqarniakujunneq ajorpunga. Inerteqquteqarniartarneq oqallisiginiartarnikuugaluarpara – pujortarunnaarneq, orsukinnerusunik nerisaqalerneq assigisaallu allat – tamannali uannut naleqquppallaanngilaq. Inerteqqutinik malinnittussianngorlunga pinngortitaanikuusimarpasinngilanga. Inuppassuit aamma taamatut misigisarunarput: Imminut inorsilluni anguniagassinneq, iluatsinngitsooraannilu pakatsinermik misiginermik kinguneqartartoq.

2026-mi suna ukiortaami anguniagaraajuk?

- Allamut saatsissavara. Unitsinniagaqarniarnermiit inuuninni perusunnerusakka ukkatarissavakka: asanninneq, peqqinnerulerneq pisuttuarnerunerlu. Eqqarsartaatsikkut sunniuteqarnerujussuuvoq. Alloriarnerit annikitsukkuutaarlugit. Yogartalerlunga imatut iliuuseqarlunga: Ullormut minutsit marluk. Taava minutsit pingasunngorpata angusaq pitsanngoriaateqariissaaq. Qaratsap nuannaalersitsisartumik pilersuineranut tunngavoq. Taamaattumik 2026-mi ukiortaami anguniagara ajornanngitsunnguuvoq: Asanninneruneq. Ullormut minutsit marluk, angusaqarluarnissamut aqqutissaalluarpoq.

Inunnguaq Petrussen, Kalaallit Nunaanni Filminstitutimi pisortaq:

Ukiortaami anguniagaqartarpit – imaluunniit imminut salloqittaanertut pisariaqanngitsutut isigisarpiuk?

- Ukioq tamaat uannut unammillerneq nuannarisarpara, imminullu pakatsisinnissara nuannarineq ajorlugu. Anguniagassaq piviusorsiortutut isigigaangakku – aamma angorusulluinnarlugu malugigaangakku –ukiumi nutaami anguniagassittarpunga. Nipilersukkat saqqummersitakka arlallit taamaasiornikkut angunikuuakka: imminut neriorsuutit qimarratigisinnaanngisakka.

2026-mi suna ukiortaami anguniagaraajuk?

- Ukiumi nutaami filminstitutip ingerlanneqarnera aalluttussaavara. Pingaarnertut suliassaraara. Inuttulli nammineq anguniagassaqassaguma qaammammut ikinnerpaamik atuagaq ataaseq naallugu atuartarusuppara.

Atuagarlu Dostojeviskij ukiut ingerlanerini arlaleriarlunga aallartittarsimagaluakkama atuarnissaa maanna pimooruttariaqalerpara. 

Michael Binzer, piginneqataasoq:

Ukiortaami anguniagaqartarpit – imaluunniit imminut salloqittaanertut pisariaqanngitsutut isigisarpiuk?

- Ukiortaami anguniagaqarneq uannoortorsuunngilaq. Taamaattorli ukioq kingulleq uannut – ilaquttannullu ­– neriorsuuteqarpunga: timersornerulertariaqarlunga, ilaquttakkalu peqatiginerulerniarlugit. Tamannalu januaarimiilli attappara, taamaammat ukiortaami anguniagassatut taaneqarsinnaagunarpoq, naak oqaaseq taanna atugarinngikkaluaringa.

2026-mi suna ukiortaami anguniagaraajuk?

- Ukiumi nutaami anguniagaqassaguma – itinerusumik anersaartortalertariaqarpunga – piffissamilu maannamiinnerullunga. Aamma ullorsiutit ulikkaaqqagaluarpata, ataaatsimiiffissallu amerlagaluarpata. Misiginikuuara attaveqatigiinnermi, suliffimmi inuttullu, qanimut attaveqarneq qanoq pingaaruteqartigisoq. Oqaloqatigiinnerit ataatsimiinnerillu attaveqarluarnikkut qanoq pitsaanerulertigisarnerat maluginikuullugu. 2026-mi suliniuteqarnerujumaarpunga, neriuppungalu tamanna nuliama meeqqamalu malugiumaaraat.

Malene V. Rasmussen, Kommune Kujallermi borgmesteri:

Ukiortaami anguniagaqartarpit – imaluunniit imminut salloqittaanertut pisariaqanngitsutut isigisarpiuk?

- Ukiortaami anguniagaqartarneq isumassaqartinngilara, taamaammat naamik. Ullut tamaasa — januaarip aallaqqaataaniinnaanngitsoq — inuunermik pitsanngorsaanissamut periarfissaqartuaannartoq isumaqarpunga. Aqagussaq qulakkeerneqarsinnaanngimmat annikitsualuit qujamasuutigisariaqarpavut. Inuuneq allanngorartuarpoq, ukiullu tamaasa ilimaginngisatsinnik pisoqartarluni. Taamaattumik ukioq nutaaq naatsorsuuteqarfiginagu eqqissisimallungalu aallartissavara, isumaqaramami ullut ataasiakkaarlugit ingerlakkaanni suut tamarmik ajunngitsumik naammassineqartartut.

Asii Berthelsen, ilinniartoq FCK-milu arsaattartoq:

Ukiortaami anguniagaqartarpit – imaluunniit imminut salloqittaanertut pisariaqanngitsutut isigisarpiuk? - Ukiortaami anguniagaqarniartorujussuunngikkaluarlunga ukiup nikinnerani ulluinnarni allannguilaarnissara nuannaraara. Taamaammat taamaalluarsinnaavoq.

2026-mi suna ukiortaami anguniagaraajuk? - 2026-mi inuit attaveqaqatigiittarfiinik atuinera annikillisissavara, nutaarsiassallu malinnaaffigilluarnerulerlugit. Qimmima kukiiartarnissaa pikkoriffiginerussavara – haha. Internetimut tinguartisimavallaaleraangatta piffissap qanoq sukkatigisinnaasanera paasilerpara, taamaammallu avatangiisikka malinnaavigivallaarunnaartoorsimallugi. Taanna allanngortikkusuppara. 

Malik Berthelsen, Qeqqata Kommuniani borgmesteri:

Ukiortaami anguniagaqartarpit – imaluunniit imminut salloqittaanertut pisariaqanngitsutut isigisarpiuk?

Aap, ukiortaami anguniagaqartarpunga. Arctic Circle Race sioqqullugu 4-5 kiilunik oqinnerulernissara, ukiut tamaasa aalajangiuttarpara – ajoraluartumilli iluatsinngitsoortuaannarlugu.

2026-mi suna ukiortaami anguniagaraajuk?

- Feeriaqqammerama, assilisallu isiginnaaraangakkit takusinnaavara oqilinissara pimoorunnerusariaqarlugu. Taamaattumik aalajangiuppara 2026-mi anguniagara angusinnaassagukku, piviusumik iliuuseqartariarlunga.

Sooq tamannarpiaq iliuuseqarfiginiarpiuk — aamma isumaqarpit januaari tamaat aallutiinnassallugu?

- Timimik atuineq kiffaanngissuseqarnissamut inuunermilu ingerlalluarnissamut pisariaqartutut isigaara. Aamma neriuutigaara – ukioqqortuneruleraluarumaluunniit – pinngortitami angalaarneq nuannariuaannassallugu. Aamma qanorluunniit pisoqarnissaa apeqqutaatinnagu, anguniagara angorusuppara, tassa Sisimiunit Kangerlussuarmut 2026-mi qimussernissara imaluunniit Kangerlussuarmit Sisimiunut ujakkaarnissara. Eqqarsaatigiinnarlugu qilanaalereerpunga.