Ukiortaamut unnuaa ulapiffiusorujussuusoq

Ukiortaap unnuaa Kalaallit Nunaanni politiinut ulapiffiusorujussuusoq, pigaartut pisortaat Aputsiaq Hansen Sermitsiamut oqaluttuarpoq.

Ilaatigut politiit angerlarsimaffinni eqqissiviilliornernut 25-t missaannut ornigupput, taakkunanngalu amerlanerit imigassarsorsimasuupput, amerlasuunilu aamma angerlarsimaffinni meerartaqarpoq.

- Taakku uatsinnit passutissallugit amerlavallaarput. Amerlasuutigut sanilit piffimmi paggittoqarsoralugu nalunaarutiginnittarput, taavalu orniguttarpagut persutaasoqarneralu oqqattoqaannarneraluunniit pineqarnersoq misissorlugu, Aputsiaq Hansen nassuiaavoq.

Aammattaaq persuttaanerit 13-t politiinut nalunaarutigineqarput, pisullu ilaanni suliassanik aallartitsisoqarpoq, taakkulu maana politiinit misissorneqarput.

Inuit kissaatigineqanngitsut aalakoortullu

Tamatuma saniatigut inuit kissaatigineqarnatik najuttut arlallit nalunaarutigineqarput, taakkununngalu politiit akuliutsinneqarput.

- Nalinginnaasumik inuit aalakoortuusarput piffimmit aalajangersimasumit qimagukkumanngitsut, taamaattoqarneranullu politiit ornigutsillugit ikiuukkiartortittarpagut, Aputsiaq Hansen oqarpoq.

Taamattaaq politiit aalakoortunik qulinik nalunaarutiginnipput, taakkulu tassaapput inuit imminnut isumagisinnaajunnaarlutik aalakoortut.

- Unnuattaaq ingerlanerani isertitsivitsinni tigusanik arlalinnik unnuisitsivugut. Taakku nalinginnaasumik qaatusserneqartarput, sisamanngornermilu ullaakkut suli inuppaaluit isertitsivinniitippagut. Inunnik sivisunerusumik tigummigallarneqartussanngortitassanik isertitsivimmiittuuteqanngilagut. Qaatuppata iperassavagut, Aputsiaq Hansen oqarpoq.

Imigassartorsimallutik biilertut ikinneri nersualaarai

Politiit unnuap ingerlanerani navianarsorisanik qummoroortartortoqarneranik marlunnik nalunaarfigineqarput. Assersuutigalugu illup assigisaataluunniit tungaanut qummoroortitsinerit, pigaartullu pisortaata pisut marluk misissorneqartut oqaluttuaraa.

Taamattaaq tillinniarnernik, tillinnernik, containerit ikuallannerinik taamatullu aamma aserorterinernik arlalinnik aqqusinermilu eqqissiviilliortitsinernik arlalinnik nalunaarutiginnittoqarpoq.