Ukiumoortumik naatsorsukkat 22.000-t tikillugit kukkunillit

Innuttaasut 22.000-t tikillugit Suila-tapinut ukiumoortumik naatsorsuutaat maanna aaqqinneqassapput. Taama Akileraartarnermut Aqutsisoqarfik tusagassiortunut nalunaarummi allappoq.

Innutaasut ilaasa utertillugit akiliutaat amerlissasut, allallu annikinnerusumik utertitsillutik akiliinissat kinguneqaataassasoq aqutsisoqarfik allappoq. Innuttaasut ilaat amerlanernik pissarsissapput, allallu 20. august Suila-tapinut ukiumoortumik naatsorsukkami nassiunneqartumit siullermit annikinnerusunik pissarsissapput.

Suila-tapinut ukiumoortumik naatsorsukkat nutaat nassiunneqareerpata aatsaat Akileraartarnermut Aqutsisoqarfik akiligassanik akiliutissanillu nassiussissasoq, aqutsisoqarfik nalunaarpoq.

Suila-tapit innuttaasunut 70.000 kr-t 500.000 kr-illu akornanni isertitaqartunut sulinermut ilanngaataapput, ilanngaallu 1. januar 2025-p kingorna akilerneqartalerpoq.

Akileraartarnermut Aqutsisoqarfiup kukkunerit pingasut paasivai:

• Innuttaasunut 2025-p TAAMAALLAAT ilaannaani Kalaallit Nunaannut tamakkiisumik akileraartussaatitaasunut naatsorsuinerni kukkunerit.

• Kalaallit Nunaanni soraarnerussutisiassanut paasissutissat ilaasa nalunaarsorneqarneranni kukkunerit.

• Soraarnerussutisiassat sulisitsisunit akilerneqartut isertitanut toqqammaviit naatsorsorneqarnerannut ilanngunneqannginneri.

Suila-tapinut ukiumoortumik naatsorsuutit aaqqinnissaat ulapputigineqartoq, Akileraartarnermut Aqutsisoqarfiup oqaatigaa. Innuttaasut paasissutissaatimikkut aaqqiivigineqartut, ulloq 10. September Suila-tapinut ukiumut naatsorsukkamik nutaamik tigusinissartik ilimagisinnaagaat aqutsisoqarfiup maanna ilimagaa.

AAMMA ATUARUK

innuttaasut 7.161-it Suila-tapit utertillugit akiliissapput: - Taamaattumik isumaqanngilaq

Innuttaasut 7.161-t Suila-tapinut katillugit 30,2 million koruuninik utertitsillutik akiliissasut, innuttaasullu 9.443-t annikippallaanik tunineqarsimasut, aningaasassaqartullu Sermitsiap siusinnerusukkut oqaluttuaraa.