Ukiut 40-t atorfeqarnerminut nersornaaserneqartoq

Helga Martha Olsen Lennert, Qeqqata Kommuniani fuldmægtigi, kommunimi ukiuni 40-ni atorfeqarsimanerminut Kunngip Nersornaasiuttagaanik sølviusumik nersornaaserneqarpoq. Qeqqata Kommunia tusagassiuutinut nalunaarummini taama allappoq.

Helga siullermik Sisimiut Kommunerisimasaani, kingornalu Qeqqata Kommuniani ukiuni 40-ni, borgmesterit arfinillit ataanni sulisimavoq. Tamanna immikkuullarilluinnarpoq – minnerunngitsumik ullutsinni suut tamarmik allanngoriartornerini immikkuullarilluinnartuni, kommunimit allapput.

Nersornaat Helgap ilaqutai nalunngisaalu qaninnerit suleqataalu peqatigalugit, Sisimiuni kommunip ataatsimiittarfiani nalliuttorsiorpalaartumik borgmesterimit Malik Berthelsenimit tunniunneqarpoq.

- Helga tassaavoq kommunip ilisimasaqarfigisaanik ingerlatitseqqiisartoq. Ilumoortuunissaq pingaartitarivaa, toqqissisimanermik tunisisarluni, tatiginartuulluni pikkorissuullunilu, pisut ilaanni aalajangersimasuusinnaasarpoq qiimasuullunilu. Ulluinnarni illalaarnissamut quiasaarnissamullu ilaajuaannarpoq, Qeqqata Kommunianit persuarsiornanngitsumik taama allattoqarpoq.

Kunngip Nersornaasiuttagaa, kunngeqarfimmi Danmarkimi kunngip nersornaatitut tunniuttagaanni pisoqaanersaavoq. Aalajaatsumik sulisimanermut nersornaatitut 1792-imili nersornaasiutigineqartalerluni.