Ulloq unnuarlu nalunaarusiaq: Arnaq aalakoortoq imerniartarfimmi aallaasitaaminik misiliiniarluni sioorasaarisoq

Arfininngornerup unnukkua Kalaallit Nunaanni Politiinut eqqissisimanakannerpoq, taamak oqaluttuarpoq politiit nakkutilliisitaasa pisortaat Lars Even. Eqqissisimanakanneraluartorli suliassaqalaartuaannarpoq.

Ilulissani politiit arfininngornerup unnukkuani nalunaaqutaq 23.35 nalunaarfigineqarput Facebook-ikkut sioorasaarummik ikkussisoqarsimasoq.

Arnaq tassani allassimavoq, nammineq nutaamik aallaasitaarsimalluni, taannalu atorlugu imerniartarfimmi aalajangersimasumi aallaasitaani misilinniarlugu.

Politiit arnamut ornigupput, taanna kollegiat ilaanni ineeqqamiippoq. Aalakoortorujussuuvoq, politiillu arnaq aalakoortunut isertitsivimmukaappaat unnuisillugulu.

Kollegiami ineeqqami politiit aallaasiusinnaasumik ujaasigaluarput nassaaratilli. Taamaattorli arnaq sioorasaarisimasutut unnerluutigineqarpoq, nakkutilliisut pisortaat oqaluttuarpoq.

Tallimanngornermi unnukkut Kuummiuni aallaasersortoqarpoq, tassanilu innuttaasut aallaasersortoq unitsissinnaasimavaat. Suliamut tassunga tunngatillugu politiit kaammattuuteqarnikuupput pisoq pillugu ilisimannittoqaruni politiinut saaffiginnittoqassasoq.