Anthonia Petersen Brandtip anaanani Erika Petersen sapaatip-akunnerani kingullermi inuulluaqqusussanngormagu ilisineq Danmarkimi Brønderslevip oqaluffitoqaani pivoq, kalaallisullu tussiaqatigiittoqarlunilu, issumeerineqarlunilu ataatarpoortoqarpoq.
Aalborgimi erinarsoqatigiit Ullorissat taamaaliorput, taakkulu ajoqi Ove Poulsen Hirtshalsimeersoq peqatigalugu ilisinermi naalagiarnermilu kalaallisut tussiartarneq pingaartitaraat.
Anthonia Petersen Brandtip anaanani Erika Petersen sapaatip-akunnerani kingullermi inuulluaqqusussanngormagu ilisineq Danmarkimi Brønderslevip oqaluffitoqaani pivoq, kalaallisullu tussiaqatigiittoqarlunilu, issumeerineqarlunilu ataatarpoortoqarpoq.
Aalborgimi erinarsoqatigiit Ullorissat taamaaliorput, taakkulu ajoqi Ove Poulsen Hirtshalsimeersoq peqatigalugu ilisinermi naalagiarnermilu kalaallisut tussiartarneq pingaartitaraat.
Ullorissat Danmarkimi aningaasanut inatsimmi akuerineqarsimalerput, tassani erinarsoqatigiit kalaallit Danmarkimiittut naalagiartarnerannut oqaluffimmilu sulianut tapersersuinissamut 500.000 koruuninik tunineqarput.
Erika Petersenip Brønderslevimi ilisaanerani palasi Thomas Søvndal naalagiartitsimmat malittarisassat ileqqullu danskit oqaluffianni atorneqartartut malillugit ilisineq ingerlanneqarpoq. Kisianni Ullorissat aamma ilisinermi peqataasut kalaallisut tussiarsinnaanissaat periarfissiissutigineqarpoq – naggataatigullu palasi ajoqi Ove Poulsen peqatigalugu illerfik oqaluffimmit anninneqartinnagu danskisut kalaallisullu issumeeripput.
Jennifer Angel Wintherip organistillu Tobias Naumannip ullormut tussiutissat qimerloorpaat. Anine Rantala saamerliuvoq.
Assi: Jesper Hansen
Arriitsuaraasut
Ullormi tamatumani Tobias Naumann, ukiorpassuarni Ullorissanit suleqatigineqartoq organistiuvoq. Taanna Tysklandimeersuuvoq, suleqatigiinnikkullu kalaallit tussiaasiaat pillugit ilikkagaqarsimaqaaq.
- Arriitsuararsuusarput Kitaani tussiaasiornermit allaanerulluinnartumik ingerlariaaseqartarput – siullermik Ullorissat appeqatigigakkit unammillernarnikuuvoq. Tusarneqaalli, Tobias Neumann nassuiaavoq.
Ilisinermut kalaallit ilaatinneqarnerat Anthonia Petersen Brandtimut pingaaruteqartorujussuuvoq.
- Kalaallisut tussiutit kulturitsinnut ilaammata qaatuussaraagut. Kalaallisut tussiaraangatta uummamminngaanneersutut ittarpoq – Ullorissallu peqataanerisigut ilisineq kusanartumik ingerlanneqarpoq, tamannalu nuannaarutigeqaara, Anthonia Petersen Brandt, ukiut marluk matuma siorna ataataminik ilisisimasoq, oqarpoq.
- Ilisineq danskisut ingerlanneqarpoq, soorlu Danmarkimi oqaluffinni taamaaliortoqartartoq. Malittarisassat taamaapput, anaanamali ilisaanerani kalaallisut tussiartoqarnera aamma ataatarpoorlunilu issumeerisoqarsinnaanera nuannaarutigeqaara. Nuanneqaaq misigisarlu – alianartut akornanni - nuannerpoq. Tamanna qujamasuutigeqaara.
Ullorissat arfineq-pingasunik ilaasortaqartut Aalborgimi Vor Frue Kirkemi oqaluffeqarput. Oqaluffik Aalborgip qeqqaniippoq kalaallillu amerlasuut ilagiinniipput. Jennifer Angel Winther, aamma Ullorissanni erinarsoqatigiinni aqutsisoq, ukiualuit matuma siorna nalunaaquttap akunnerini arlaqanngitsuni oqaluffimmi tussiartussatut atorneqarsimavoq – oqaluffillu aamma tussiutinik kalaallisuunik pissarsisimavoq.
Brønderslevimi ilisinermi ajoqi Ove Poulsen kalaallisut ataatarpoorpoq.
Assi: Jesper Hansen
Piumassuseq nukiusoq
Ullorissat ukiut sisamat matuma siorna Jyllandip avannaani ilisinerni kalaallisullu naalagiartitsinerni, ajoqimit Ove Poulsenimit Paamiuneersumit maannali Danmarkimi ukiorpassuarni najugaqartumit, ingerlanneqartartuni erinarsortalerput.
- Piumassuseq nukiuvoq, Jennifer Angel Winther oqarpoq.
- Allanut tunisineq Ullorissaniittunut tamatsinnut nukissaqalersitsisarpoq - tamannalu pingaartingaarparput. Ilisinermut peqataagaangatta nuannaarutaanera tamatigut malugisarpara - tamannalu uagutsinnut tunissutaavoq annertooq.
Jyllandip avannaani naalagiartarnerit saniatigut Ullorissat ilisinerni peqataasarput – Jyllandip avannaaniinnaanngitsoq, nunali tamakkerlugu. Taamaalillutik kilometererpassuit biilertarput, Jenniferillu ilani ilaasorisarpai.
- Tamaasaanngitsoq, amerlanertigulli pingasuulluta sisamaallutaluunniit tussiariartarpugut. Ukiup ataatsip ingerlanerani 30.000 kilometerit sinnerlugit angalavugut.
- Taamaammat aamma aningaasanut inatsit aqqutigalugu tapiiffigineqarnerput nuannaarutigaarput. Aningaasat ilaat angalanitsinnut atorneqassapput. Aamma kalaallit katinngataannik pisinissaq pilersaarutigaarput.
- Kalaallit ataatsimooraangatta Erfalasorput pingaartittarparput. Oqaluffinniikkaangatta uagutsinnut kalaallinut tamanna pingaaruteqarmat kalaallit erfalasuannik pissarsinissaat isumassarsiatsialaasoq aamma tamatigut oqaluttuarisarparput. Kissaateqartarnerput qujanartumik sumiiffippassuarni tigulluarneqartarpoq, kisianni tamarmik taamaaliortanngillat – taamaammat katinngateqarnissarput pingaaruteqarpoq.
Ilinniaqqinneq
Ullorissani ilaasortat ilaat marluk, Jennifer Angel Winther aamma Marie Lynge Møller, Aarhusimi Diakonskolenimi ilinnialeruttorput. Ilinniarneq kalaallit ajoqitut ilinniagaannut assingusoq Jennifer Angel Wintherip oqaatigaa, taamaalillutillu Ove Poulsenip ullumikkut Ullorissat suleqatigalugit suliarisartagaasa ilaanik kivitsinissamut periarfissaqalissapput.
- Ilinniarneq akisummat aningaasanut inatsimmiit aningaasaliissutit ilaasa ilinniarnitsinni aningaasartuutinut matussusiissutigineqarnissaat isumaqatigiissutigaarput – aamma tussiutinik kalaallisoortunik oqaluffinni taakkuninnga peqanngiffiusuni ilisinermi nassarsinnaasatsinnik pisisinnaalissalluta takorluugaraarput.
- Tamannali kingusinnerusukkut piumaarpoq. Maanna aningaasaliinerutinnata 50.000 koruunit qanoq atsiginersut misissoqqissaassavarput, Jennifer Angel Winther oqaluttuarpoq.
- Aningaasanut inatsimmit tapersersuineq nuannaarutigeqaarput. Tamanna akuersaarneruvoq, Danmarkimi kalaallit pisariaqartitaannik annertuumik matussusiisinnaanitsinnut politikkerinit nassuerutaasoq.
