Umiarsuit takornariartaatit tikittarnerat: Illoqarfiit uku nuannarineqarnerpaapput
Umiarsuarnik takornariartaatit 2025-mi tikittut ukiup siulianut sanilliullugit ikilerialaarsimagaluartut, kommuninut isertitaqarnerujussuanngorpoq. Umiarsuit takornariartaatit Paamiunut tikittut tallimariaammik amerlisimapput, tikinneqarnerpaallu pingajuattut inissilluni.
Umiarsuit takornariartaatinut ilaasut Kalaallit Nunaanni umiarsualivinnut katillugit 213.674-eriarlutik tikipput, tassa ukiup siulianut sanilliullugu 17,8 procentimik amerleriarput.
Toqqorsivimmit: Jørgen Schultz-Nielsen
Kommunit umiarsuarnik takornariartaatinik aningaasarsiornermut isertitanik amerlanerungaartunik ukioq manna pissarsinissartik naatsorsuutigisinnaavaat.
Naatsorsueqqissaartarfiup umiarsuit takornariartaatitKalaallit Nunaannut tikittut 2025-mi amerlassusaat saqqummiuppai. Angalasut 93.897-it tikipput, 2024-mullu sanilliullugit 1,4 procentinik ikileriarlutik.
Kisitsisit misissoqqissaaraanni takornariat Kalaallit Nunaannut tikittut katillugit 213.674-eriarlutik tulassimanerat nuannersortaavoq, tassa ukiup siulianut sanilliullugu 17,8 procentimik amerleriarsimallutik. Umiarsualivimmi tikinnermi angalasumut ataatsimut avatangiisinut aserfallatsaaliuinermullu akitsuummik taaneqartartumik 50 koruuninik akiliisoqartarmat kommunit aningaasarpassuit umiarsualivinni pitsanngorsaanissamut atorsinnaavaat.
Siuariarneq annerpaaq
Paamiunut Nuummullu tikittut amerleriarujussuarsimasut kisitsisit takutippaat. Tassani ukiup siulianut sanilliullugu 24.677-inik aamma 6.914-inik amerlanerupput, tamannalu illoqarfiit pingaarnersaata kommunianut 1,5 millionit koruunit sinnerlugit isertitaqarfiuneruvoq.
Ineriartornerli qummuinnaq ingerlanngilaq. Nanortalimmut tikittut 5.037-nik ikileriarput, Ilulissanullu tikittut 3.234-nik ikileriarlutik.
2025-mi umiarsuarnik tikinneqarnerpaat ima isikkoqarput — 2024-mi inissisimanerat parentesi iluaniilluni:
- Qaqortoq - 46.327 (1)
- Nuuk - 44.156 (2)
- Paamiut - 29.873 (8)
- Nanortalik - 23.900 (3)
- Sisimiut - 16.669 (4)
Paamiut tikinneqarnerujussuunerata kinguneranik Ilulissat tikinneqarnerpaaniit tallimaasuniit peerpoq.
Umiarsuit takornariartaatit Akileraartarnermut Aqutsisoqarfimmut nalunaarutai tunngavigalugit kisitsisit naatsorsorneqarput. Qassiarsuk akitsuuteqanngitsuuvoq, taamaattumik umiarsuarnit tikittunit Akileraartarnermut Aqutsisoqarfik nalunaarutinik tigusaqarani.
Aallerfik: Naatsorsueqqissaartarfik
Akileraartarnermut Aqutsisoqarfik avatangiisinut aserfallatsaaliuinermullu akitsuummik, kommuninut ataasiakkaanut agguaanneqartartumik, akiliisitsisartuuvoq.
Ameriamiut amerlanerusut
Amerikamiut umiarsuarnik takornariartaatinik Kalaallit Nunaannut tikeraartut amerlanerupput.
Umiarsuarnut takornariartaatinut ilaasut affaat sinnerlugit — 47.577-it — USA-meersuupput, Tysklandimeersut tulliullutik 10.926-upput Tuluillu Nunaanneersut 6.739-ullutik.
