Unitedip Nuup New Yorkillu akornanni aasaanerani timmisartuussinini aallarteqqikkaa

Angalasut 4.800-t sinnerlugit aqqut taanna siorna 2025-mi aasakkut timmisartuussinermi atorsimavaat. United Airlines Nuup Newarkip/New Yorkip akornanni aasaq manna septembarip 23-ata tungaanut timmisartuussisassaaq.

United Airlinesip siorna aasakkut 58-eriarluni aqqummi tassani timmisartuussinerani ilaasut 4.800-t angalasimapput. Timmisartuussinermi Boeing 737 MAX 8 atorneqartarpoq.

Assi: United Airlines

Arnaq Nielsen Arnaq Nielsen Tusagassiortoq

Saqqummersinneqarpoq 8. Juuni 2026 - 13:58

Annonse

SAS-ip Københavnimit Nuummut timmisartuussinissaraluani aasaq manna taamaatiinnarai United Airlines uteqqippoq. Arfininngormallu juunip arfernani aasaq manna siullermeerluni timmisartuussisoqareerluni.

Aqqummi tassani septembarip 23-ata tungaanut timmisartuussisoqartassasoq timmisartortitseqatigiit nalunaarutigaat.

Nuup New Yorkillu akornanni timmisartuussineq siorna aasaanerani ammarneqaraluartoq siorna timmisartuussinernut 58-inut angalasut 4.800-t sinnerlugit ilaasimasut United Airlinesip paasissutissiissutigaa.

Kalaalllit Nunaata USA-llu akornanni toqqaannartumik aqqut

United Airlines suli tassaavoq amerikamiut timmisartortitseqatigiiffiisa akornanni kisiartaalluni Kalaallit Nunaata USA-llu akornanni toqqaannartumik timmisartuussisartoq.

Aqqut taanna Atlantikoq qulaallugu angalasut aqqusaarfigilluartagaanut Newark Liberty International Airportimut toqqaannartumik timmisartuussiffiusarpoq. Mittarfimmiit tassannga Amerikap Kujataanut Avannaanullu sumiiffinnut 80-init amerlanerusunut ingerlaqqittoqarsinnaalluni.

- Nuummut aasaanerani uteqqissinnaanerput nuannaarutigaarput, Amit Badiani, United Airlinesip Afrikami Europamilu offlinemik tuniniaanermi pisortaa taama oqarpoq.

Timmisartuussinerup ammaqqinneqarnera Greenland Airportsimit aamma nuannaarutigaat. Aqqut nunatsinnut angalarusuttut amerlinissaannut iluaqutaassasoq Greenland Airportsimi niuernermut pisortap René Von Ahm Laursenip oqaatigaa, United Airlinesimillu pitsaasumik suleqateqarnertik naqissuserlugu.