POLITIIT ULLOQ UNNUARLU NALUNAARUTAAT
Upernaviup eqqaaniittoq Tasiusaq suli attaveeruteqqavoq
Tusass tallimanngornermi unnukkiartornerani ajutoornermik nalunaaruteqarpoq Tasiusaq Upernaviup eqqaaniittoq innaallagiaarussimanerarlugu tamatumalu kingunerisaanik attaveqaatitit kipisimasut. Kalaallit Nunaanni Politiit satellitsikkut attaveqalersitsipput, taamaalilluni nunaqarfimmiit politiit upalungaarsimasullu attaveqarfigisinnaassagaat qulakkeerneqarluni.
Kalaallit Nunaanni politiit Tasiusaq satellitikkut attaveqaateqalerpaat, taamaalillutillu nunaqarfimmiut oqartussaasunut pisariaqartitsissagunik attaveqarsinnaalersinneqarput. - Qujanartumilli maannamut pisariaqartitsinngillat, attaveqaqatit atorsinnaannginnerisa nalaanni, vagtchef Thomas Jeppesen Kalaallit Nunaanni politiinit oqaluttuarpoq.
Assi: Oscar Scott Carl
Nutartigaq: Sapaammi ullaap tungaani Kalaallit Nunaanni Politiinit Nukissiorfinniillu ilisimatitsissutigineqarpoq Tasiusaq Upernaviup eqqaaniittoq innaallagiaaruttoorsimanngitsoq, taamaallaalli pilersaarutaareersumik Tasiusami nunaqarfiup ilaani pilersaarutaasumik innaallagissamik qamitsigallartoqarsimasoq.
Sermitsiamit tusass attaviginiarnikuuarput, nittartakkamini ilisimatitsinikuummat attaveqaatit innaallagiaaruttoornermik pissuteqarnerarlugit "qamittoortoqarsimanera peqqutaalluni Tasiusaq attaveqanngikkallarpoq. Nukissiorfiit ajoqut aaqqinniarlugu suliaqarput." Tusass tallimanngormat nalunaarpoq.
Inuit 250-t missaanniittut, Tasiusami Upernaviup eqqaaniittumi nunaqarfiata innuttaasut, sapaatip akunnerata naalernerani tallimanngornermi ualikkut kingusissukkut oqarasuaatitigut internetsikkullu attaveeruppoq, taamaalillunilu avammut attaveerulluni.
Kalaallit Nunaanni Politiit paasiniariaramillu nunaqarfik attaveeruttoq, satellitsikkut attaveqalersippaat, taamaalillutillu innuttaasut pisariaqartitsissagunik oqartussanut attaveqarsinnaalersillugit oqartussaasullu ikiuiartorlutik ornigussinnaaniassammata:
- Kalaallit Nunaanni Politiinut pingaaruteqarpoq qulakkeersimassallugu tamatigut oqartussanut attaveqarsinnaanissaq, politiit, qatserisartut imaluunniit peqqinnissaqarfik attavigineqarsinnaajuaannarsinnaassammata.
- Taamaattumik erngerluta nunaqarfik satellitsikkut attaveqalersipparput paasigatsigu attaveerussimasoq, Kalaallit Nunaanni Politiini nakkutilliisuutitat pisortaat, Thomas Jeppesen oqarpoq.
Tusassip ingerlatsinermut paasissutissiineranut naapertuutillugu Tasiusaq suli attaveqanngilaq.
Sermitsiamit Nukissiorfinnut attaveqarnikuuvugut, Nukissiorfinniillu oqaatigineqarpoq Tasiusaq innaallagiaaruttoorsimanngitsoq taamaallaallu Tasiusap ilaani sivikitsumik pilersaarutaareersumik qamitsisimallutik.
