USA-mi senatorit kongressimilu ilaasortat aqqanillit tamarmik Danmarkimut Kalaallit Nunaannullu "ikinngutaapput“. Taamaammat Donald Trumpimut, piumasaannarminik iliortumut, sunniuteqarsinnaanerat killeqarpoq.
Rasmus Sinding Søndergaard, USA-p nunanut allanut politikkianik DIIS-imi ilisimatusartoq taama naliliivoq.
USA-mi senatorit kongressimilu ilaasortat aqqanillit tamarmik Danmarkimut Kalaallit Nunaannullu "ikinngutaapput“. Taamaammat Donald Trumpimut, piumasaannarminik iliortumut, sunniuteqarsinnaanerat killeqarpoq.
Rasmus Sinding Søndergaard, USA-p nunanut allanut politikkianik DIIS-imi ilisimatusartoq taama naliliivoq.
Kunngeqarfimmik tapersersuineq
Inatsisartut Nunanut Allanut Sillimaniarnermullu Ataatsimiititaliaani ilaasortat Trumpip Kalaallit Nunaannik tiguaanissamik nalunaarutaa pissutigalugu Kalaallit Nunaata, Danmarkip USA-llu akornanni ajornartorsiutaasoq eqqartorniarlugu Amerikamiut senatoriinit kongressimilu ilaasortanit aallartitat tallimanngornermi ataatsimeeqatigaat.
Aallartitat siuttuisa, senatorip Chris Coons Demokraatineersup oqaasii naapertorlugit ataatsimiinnerit "Kunngeqarfimmut Danmarkimut tapersersuinermut tunngassuteqarput“ aamma "naalakkersuisinnaatitaanermik namminerlu aalajangiisinnaatitaanermik najoqqutassianut ataatsimoortunut naapertuuttumik qanoq ililluni suleqatigiinnerup itinerusumik ineriartortinneqarsinnaanera“ oqaluuserineqarpoq.
Chris Coonip, Delawaremit sinniisuusup, saniatigut senatorit Demokraatineersut Jeanne Shaheen New Hampshiremeersoq, Dick Durbin Illinoisimeersoq, Peter Welch Vermontimeersoq, senatorit Republikaneriusut Thom Tillis North Carolinameersoq aamma Lisa Murkowski Alaskameersoq peqataapput. Aamma Demokraatit sinnerlugit kongressimi ilaasortat Gregory Meeks, Madeleine Dean, Sara Jacobs, Sarah McBride aamma Steny Hoyer ataatsimiinnermut najuupput.
– Politikkikkut oqariartuut takutinniarneqartoq tassaavoq Kongressimi partiini illuatugeriinni Donald Trumpip Kalaallit Nunaannut tinguaanissaa pillugu akerliusunik ilaasortaqartoq, aamma Kalaallit Nunaata namminersulivinneranik ataqqinnittunik Naalagaaffeqatigiillu USA-llu akornanni attaveqarnermik nukittorsaanissamik soqutigisalinnik politikeriusoqartoq, Rasmus Sinding Søndergaard oqarpoq.
Pissaaneq isumaqarluinnartoq, killeqartorli
Politikerit taakkua præsidentip pilersaarutaanik allanngortitsiniarnerminni qanoq pissaaneqartiginersut apeqqutaaginnarpoq:
- Pissaanerat isumaqarpallaanngilaq, USA-mili inissisimaffitsik pissutigalugu tusagassiuutitigut Amerikamiut innuttaanut oqalussinnaallutillu taamaalillutik inuit isumaannik sunniisinnaapput.
- Aammali aallartitat akornanni Demokraatinit Republikanerinillu ilaasortaqaraluartoq oqaatigisariaqarpoq, taakku Donald Trumpimut qanimut attaveqarneq ajorlutillu MAGA-mi tapersersuisunut ungasipput, taamaammat Trumpimut taassumalu aqutsineranut sunniuteqarsinnaanerat killeqarpoq.
USA-mi kongressimi inatsisartut inatsisissatut siunnersuutaat
Alaskami senatori Lisa Murkowski Kalaallit Nunaannut tunngatillugu aallartitat nuimanerpaartarigaat Rasmus Sinding Søndergaard isumaqarpoq:
– Kalaallit Nunaat Issittorlu soqutigilluinnarpai, ukiorpassuarnilu taamaattuuvoq. USA-mi kongressimi politikkerini taannavoq issittoq pillugu ilisimasaqarluarnerpaaq.
Rasmus Sinding Søndergaardip Lisa Murkowski republikanerisut ingasaassinianngitsutut, Donald Trumpimit republikanerillu partiiannit ungasinnerpaasutut, taavaa.
- Trumpi isornartorsioqqajaasarpaa, Kongressimilu qinigaaffimmi siullermi inatsisartut illorsuannut perulluliortoqarneranut tunngatillugu Trump eqqaartuussisuuneqarfimmi sassartinneqarnissaanut tapersiilluni taasiartortut ikittunnguit ilagaat. Trumpip sunniuteqarfiginissaanut periarfissaqanngilluinnartoq tamanna isumaqarpoq.
- Taannali senatoriuvoq, ilaatigut inatsisissatut siunnersuut Kongressimi saqqummiunneqaqqammersoq atsioqataaffigaa, tassanilu præsidenti NATO-mut nunat ilaasortat arlaannik tinguaasinnaaneranik killiliinissamik siunertaqarpoq. Tassa soorunami arlaatigut pissaaneqarpoq.
Alaskami senatori Lisa Murkowski aallartitat ilaat tallimanngornermi Folketingimi ilaasortanik aamma Inatsisartut Nunanut Allanut Sillimaniarnermullu Ataatsimiititaliaanni Ilaasortanik oqaloqateqartut ilagaat. Republikanerinut ilaasortani immikkut ilisimasalik naapertorlugu Donald Trumpimut ungasinnerpaavoq.
Assi: Scanpix/Ida Marie Odgaard
Sorsunnermut tunngatillugu Kongressi kisimi sorsugiaqqusisinnaasoq, aamma Kongressi kisimi sorsunnernut aningaasalersuisinnaasoq USA-p tunngaviusumik inatsisaani allassimavoq.
- Tunngaviusumik inatsisit naapertorlugit præsidenti sakkutuut qullersaraat. Kisiannili — Trumpip nalaaniinnaanngitsoq, aammali piffissami kingullermi præsidentit arlallit nalaanni — tunngaviusumik inatsisini allassimasut allanngortinniartneqartartut takusimavarput.
Aningaasaqarneq pissutigalugu Trump immaqa unitsinneqarsinnaavoq
Rasmus Sinding Søndergaard naapertorlugu Kalaallit Nunaat tiguarneqarnerata kingorna sorsunnissaminut imaluunniit Kalaallit Nunaata pisiarinissaanut aningaasanik qulakkeerinnittariaqarnera Trumpimit unitsisisinnaasut ilagaat, tamannalu kongressimit akerlilersorneqarsinnaavoq.
– Trumpip Kalaallit Nunaanni sakkutooqarnermik atuinissaanik aarlerinartoqarsinnaanera pissutigalugu Kongressi pissaaneqarnerulerpoq. Tamanna ajornakusoortitsissaaq. Inatsisilli siunnersuutigineqartut imminni naammanngillat, Rasmus Sinding Søndergaard oqarpoq, taassumalu novembarimi qinersinerup qiteqqunnerani præsidentip Senatimi inatsisartunilu amerlanerussuteqarnera allanngorsinnaassasoq, naggataatigullu præsidentip pilersaarutini naammassiuminarsisissinnaagaa aamma nalilerpaa.
