USA-mut akerliussutsimik takutitsisoqassasoq

Amerikamiut Kalaallit Nunaannik tiguaaniarnerat pillugu Danmarkimi illoqarfinni annerni arfininngorpat akerliussutsimik takutitsisoqassaaq. Akerliussutsimik takutitsinernik aaqqissuussisut tassaapput Kalaallit peqatigiiffiisa kattuffiat Inuit, kattuffik Uagut aamma Mellemfolkeligt Samvirke.

- Københavnimi, Aarhusimi Aalborgimilu arfininngornermi nalunaaqutaq 12.00 akerliussutsimik takutitsinissaq pilersaarutaavoq, taamatuttaarlu Odensemi illoqarfinnilu allani aamma akerliussutsimik takutitsisoqarnissaa naatsorsuutigaarput, Camilla Siezing Kalaallit peqatigiiffiisa kattuffianni Inuit-mi siulittaasoq oqarpoq.

- Politikkikkut sammisanut nalinginnaasumik akuliunneq ajorpugut, maannakkulli pissutsit atuuttut malillugit tamanna kalaallit tunuliaqutaannut, kinaassusiannut kulturiannullu sunniuteqassaaq. Tamanna tunuarsimaarfigiinnassallugu ajornakusoortipparput.

- Taamaammat nunaqqativut Kalaallit Nunaanniittut tapersersorniarlugit akerliussutsimik takutitsinermut peqataaniarluta aalajangerpugut. Danskit naalagaaffeqatigiinnerat Kalaallillu Nunaata nammineersinnaanera ataqqineqassasoq piumasaraarput.

Akerliussutsimik takutitsinerit eqqissisimasut

- Amerlasuut akerliussutsimik takutitsinermut peqataassasut neriuppugut - aammali kisimi oqartussaaneq naligiinnerlu pillugit ersarissunik oqariartuuteqarluni ataqqinnittumik eqqissisimasumillu pissasoq pingaartipparput, Camilla Siezing oqarpoq.

- Akerliussutsimik takutitsinermut soqutiginninneq annertoorujussuuvoq – ataasinngornermilu unnukkut nalunaarutiginninnitsinniit oqarasuaatiga sianiinnavippoq.

Inuit peqataarusuttut tapersersuerusuttullu - aammalu tusagassiortut nunanit allaneersut ullumikkut marlunngornermi sianertarput.

Københavnimi akerliussutsimik takutitsineq Rådhuspladsenimiit aallartissaaq - tamatumalu kingorna peqataasut Amerikamiut aallartitaqarfiata Østerbromiittup tungaanut ingerlaaqatigiissapput.

Aarhusimi akerliussutsimik takutitsineq Aarhusip qimuttuitsunut unittarfiata silataani aallartissaaq. Tassanngaanniit Nørregadekkoorluni Aarhusip oqaluffiata tungaanut ingerlasoqassaaq.

Illoqarfiit allat assigalugit Aalborgimi akerliussutsimik takutitsineq Nytorvimiit nalunaaqutaq 12.00 aallartissaaq, sumullu ingerlasoqassanersoq suli aalajangerneqanngilaq.

Camilla Siezingip soqutiginnittut tamaasa Kalaallit peqatigiiffiisa kattuffiata Inuit Facebookimi quppernerani pisunik malinnaaqqullugit kajumissaarpai.