USA-p aningaasaqarnermut ministeriata Indiap Kitaani qeqertat assersuutigai: – Kalaallit Nunaat USA-mut ilaassasoq iligisatta paasisariaqarpaat
Kalaallit Nunaat USA-mut ilaassasoq, tamannalu USA-p iligisaasa paasisariaqaraat, USA-p aningaasaqarnermut ministeria tusagassiortunik katersortitsinermi oqarpoq. Kalaallit Nunaat pillaatitut akitsuutinik eqqugaassanngitsoq, Danmarkilu "soqutaanngitsuusoq", aamma oqarpoq.
Assi: Denis Balibouse/Reuters/Ritzau Scanpix
USA-p aningaasaqarnermut ministeria Scott Bessent nunarsuarmi aningaasaqarneq pillugu World Economic Forumimi Davosimi Schweizimiittumi ataatsimeersuarnermi tusagassiortunik katersortitsivoq, tassanilu Kalaallit Nunaat pillugu tupaallannartunik nalunaaruteqarluni.
Siullertut, Trumpip Kalaallit Nunaata Amerikamut ilanngunnissaanik piumasaqaataanik uteqqiivoq.
- Trumpip nunarsuup kitaatungaani isumannaallisaanermik akisussaaffik nunamut allamut tunniukkumanagu erseqqissaatiginikuuaa, Scott Bessent oqarpoq.
Aningaasaqarnermut ministerip Trumpip ullumi kingusinnerusukkut oqalugiarnissaa tusarnaarneqassasoq kajumissaarutigaa, qularutiginngilaami Donald Trumpip tunngavilersuutai qularunnaarsitsissasut.
- Kalaallit Nunaat USA-mut ilaalissaaq
Aningaasaqarnermut ministeri USA Kalaallit Nunaata tiguarusunnera pissutigalugu, iligisaminut akerleriinnermik pilersitsilernersoq aamma aperineqarpoq:
- Kalaallit Nunaat USA-mut ilaalernissaa iligisatta paasisariaqaraat qinnuigaavut, Bessent oqarpoq, Indiallu Kitaata qeqertaasa 1917-imi tunineqarnikuunerat assersuutigalugu:
- Oqaluttuarisaaneq pillugu ilinniut: USA-p Indiap kitaata qeqertai Danmarkimit Sorsunnersuup siulliup nalaani pisiarai, Bessent oqarpoq.
Qeqertat sumiiffii pissutigalugit USA-mut tunniunneqarnissaasa pingaaruteqarnerat Danmarkip taamani paasigaa ilanngullugu oqaatigaa. Aamma USA-p Panamami kanaali Frankrigimit pisiarinikuunera.
Nunat sakkutuunik Kalaallit Nunaannukartitsinikut kisimik akitsuuserneqassapput
Donald Trumpip pillaatitut akitsuusersuinnissaa Kalaallit Nunaannut eqquissanngitsoq, nunalli sakkutuunik Kalaallit Nunaannukartitsisimasut pineqartut, tusagassiortunik katersortitsinermi aningaasaqarnermut ministerip aamma oqaatigaa.
- Kalaallit Nunaannut 10 procentimik akitsuusiissanngilagut, nunanilli arfineq-pingasut Kalaallit Nunaannut sakkutuunik aallartitsinikut akitsuusersuiffigissavagut.
- Naluara sakkutuunik aallartitsinermikkut qanoq oqariartuuteqarniarnersut.
USA-p naalagaaffittut pisussaaffii eqqarsaatigalugit Danmarki nunatut pingaaruteqarpallaanngitsoq, Scott Bessent oqarpoq:
- Danmarkip USA-p naalagaaffianut aningaasaliissutai Danmarkitulli pingaaruteqarpallaanngillat. 100 mio. dollarsinik ikinnerupput. Ernumassuteqanngilanga, Scott Bessent oqarpoq.
Donald Trump Davosimi ataatsimeersuarnermi nunatta nalunaaqutaa malillugu aqqarngup missaani oqalugiartussaagaluarpoq, kisianni kinguaattoormat kingusinnerusukkut pissalluni.
