USA-p eqqisseqatigiinnissaq pillugu pilersaarutaa Zelenskyjip tiguaa

Ukrainep præsidentiata, Volodymyr Zelenskyjip, amerikamiit eqqissinissamut pilersaarutissatut missingiut tigusimavaa.

Zelenskyj-p allaffia naapertorlugu, tamanna Reuters-imut sisamanngornermi nalunaarutigineqarpoq.

Ukrainemi præsidentip naatsorsuutigaa ulluni aggersuni USA-p præsidentia, Donald Trump, eqqissinissamut periarfissat pillugit oqaloqatigissallugu.

Oqaloqatigiinnerit "eqqissinissamut pingaarutilinnik" imaqassapput, taama oqaatigineqarpoq. Paasissutissat sukumiinerusut saqqummiunneqanngillat.

- Maanna piareersimavugut - siornatigutut - USA kiisalu Europami suleqatigut peqatigalugit oqaloqatigiinnissamut, taamaasilluta eqqissineq pilersinneqarsinnaaqqullugu, Zelenskyj-p allaffiani Telegram-imi allassimavoq.

Siunnersuutip imarisai pillugit allassimasoqanngikkaluartoq, isertortumik paasissutissat ilaatigut Reuters-imut aamma Financial Times-imut nassuiaatigineqarput.

Tusagassiorfiit taakkua nassuiaapput, USA-miit Ruslandimillu atorfilittat Ukrainemi sorsunnersuup unitsinneqarnissaanut siunnersuut nutaaq suliarigaat.

Tusagassiorfiit taakku naapertorlugit, Ukrainemiit Donbas-imi immikkoortortat sinneri, tassunga ilanngullugit ullumikkut Ukrainemiit aqunneqartut, tunniunneqassapput.

Aammattaaq Ukrainemiut sakkutuui affaannanngortinneqassapput, ullumikkut amerlassusaannut sanilliullugu, Financial Times allappoq.

Trumpip aqutsisoqarfiani qaffasissumik atorfilik NBC Newsimut sisamanngornermi oqarpoq  amerikamiut præsidentiata pilersaarut 28-nik immikkoortortaqartoq akuersissutigisimagaa.

- Pilersaarummi ukkatarineqarpoq illuatungeriit tamarmik isumannaatsuunissamik qulakkeerinnittoqassasoq, taamaalilluni eqqissineq attatiinnarneqarsinnaaqqullugu. Taanna ilaavoq, ukrainerit pisariaqartitaat kissaatigisaallu eqqissinerup attatiinnarneqarsinnaanissaanut, taama oqarpoq pisortaq tusagassiorfimmut.

Amerikamiut immikkut ittumik aallartitaat Steve Witkoff, atorfilittap oqarnera naapertorlugu, russit aallartitaat kirill dmitrijev peqatigalugu pilersaarut oqaloqatigiissutigisimavaa.

EU-p nunanut allanut tunngasunut ministeriisa, sisamanngornermi bruxellesimi ataatsimiittut, pilersaarut suli avammut saqqummiunneqanngitsoq pillugu avammut oqaaseqarsimanngillat. Kisianni oqaatigaat, piumasaqaatit ukrainemiut naalakkersuisuinut sakkortuutut isigineqarsinnaasut akueriumanagit.

- Ukrainemiut eqqissinissamik kissaateqarput - eqqissineq naapertuilluartoq, nunat namminiussusiannik killeqarfiinillu ataqqinnittoq kissaatigaat. Eqqissineq attatiinnarneqarsinnaasoq, siunissami saassussinikkut apeqquserneqarsinnaanngitsoq, taama oqarpoq franskit nunanut allanut tunngasunut ministeriat, Jean-Noel Barrot, Reuters naapertorlugu.

- Kisianni eqqissineq tunniutiinnarnermik isumaqassanngilaq, Barrot nangippoq.

/ritzau/