USA-p nioqqutissat Canadameersut amerlasuut 50 procentinik akitsuuserpai

Amerikamiut biilii, immunnik nioqqutissiat imigassallu tunisassiarineqartarnerat eqqarsaatigalugit, "immikkoortitsinermik pissusilersorfigineqarneq“ pissutigalugit USA Canadamiut nioqqutissaannut assigiinngitsunut 50 procentimik akitsuusiivoq.

Det Hvide Hus nittartakkamini taama allappoq.

Akitsuummik pillaatissatut immikkut ittutut taaneqartut, USA-p præsidentiata Donald Trumpip akitsuusersuinermut peqqussutit pingasut atsiorsimalerpai.

- Taamaaliornermigut præsident Trumpip Canadap immikkoortitsisutut pissusilersornera, USA-p niuerneranut nanertuutaallunilu ajoqutaasartoq akiorneqassaaq.

- Tamanna Amerikamiut avammut tunisassiaannut pingaaruteqartunut biilit, imigassat immunnillu nioqqutissiat naligiimmik unammillernissaannut qulakkeerinninneruvoq, Det Hvide Hus nittartagaani atuarneqarsinnaavoq.

Akitsuutit "suut tamarmik viinnimiit ishockeymut ajaappissanut cementimullu“ atuupput.

Nioqqutissat ilaat, soorlu nukissiuutit, puussiat, aalisakkat aatsitassallu pingaarutillit, akitsuusersorneqanngillat.

USA-p, Canadap Mexicollu killeqanngitsumik niuernissamut isumaqatigiissutaat (USMCA) nioqqutissanut allarpassuarnut siornatigut illersorneqartunut tamanna sunniuteqarpoq.

Canada immummik nioqqutissanik illersuiniaasartoq, aamma USA-mi biilinik eqqussuinermi akitsuusiisartoq killilersuisartorlu, nunanilu allani taamaaliorneq ajortoq, Det Hvide Hus-ip nittartakkamini allaaseraa.

Nutaarsiassaqartitsivik Reuters naapertorlugu Amerikamiut siorna akitsuusersuinerat aallaavigalugu, Canadami nunap immikkoortuini amerlanerni Amerikamiut imigassaannik tuniniaasarneq unitsinneqartoq nalunaarutigineqarpoq.

Det Hvide Hus naapertorlugu Canadap Amerikamiut biiliinik eqqussuinera ukiuni kingullerni 22 procentimik apparsimanera immiaaqqanillu eqqussuinerup 81 procentimik apparsimanerat maluginiarneqarsinnaavoq.

USA-p præsidentiata Donald Trumpip Canadami orpippassuarni ikuallattoqarnera, USA-mullu VM-ertoqarnerani orpippassuit ikuallannerat siaruarnera pillugu pisuutitereeraalu, Det Hvide Hus nalunaaruteqarpoq.

Mingutsitsinerup akiornissaanut aningaasartuutit annertuut Canadamiut nioqqutissaannut akitsuutit aqqutigalugit iliuuseqarfigissallugit Trump sioorasaarisoq, Reuters allappoq.

Akitsuutit ataasinngornermi saqqummiunneqartut aggustip 19-ani atuutilissapput.

Canadami ministeriuneq Mark Carney USA nalunaaruteqareersorlu ministeriuneqarfimmi nittartagaatigut oqaaseqarpoq.

Tassani USA-p akitsuusiinera illuinnarsiortutut aamma "Canadap, USA-p Mexicollu killilersugaanngitsumik niuernissamut isumaqatigiissutaannut (USMCA) toqqaannartumik akerlilerneqartoq“ oqaatigaa.

- Taakkununnga ilaapput Canadamiut biilinut akitsuutit, tamannalu USA-p Mexicollu akornanni isumaqatigiissummut naapertuutinngilaq.

- Aajornartorsiutit aaqqinniarlugit innuttaasunut iluaqutaasumik, Canada USA-mik oqaloqateqarnissamut piareersimavoq, oqarpoq.

RITZAU