USA Ukrainemi illoqarfimmi sakkuaakkunnaarallartoqarneranik nalunaarutiginnippoq

USA-mi Det Hvide Hus naapertorlugu Rusland Ukrainelu illoqarfimmi Olesjkym Ukrainemiittumi sakkuaakkunnaarallartoqarnissaa isumaqatigiissutigaat.

Reuters taama allappoq.

Det Hvide Hus naapertorlugu 29. oktober sakkuaakkunnaarallarneq, aallartinneqassaaq.

Ruslandip Ukrainellu tamanna nalunaarut uppernarsarsinnaanngilaat.

Det Hvide Hus naapertorlugu USA-mi præsidentip nulia, Melania Trump, sakkuaakkunnaarallarnissamut qulakkeerinnittuuvoq.

USA naapertorlugu sakkuaakkunnaarallarnermup inunnik ikiuiniartut tikissinnaatissavai innuttaasullu qimarngunneqarnissaanut periarfissillugit.

Oleskyj illoqarfiuvoq Ukrainep kujataani Khersonimiittoq Ruslandip maanna tiguarsimasaa.

Nalunaarutit naapertorlugit illoqarfimmi nerisassaaleqineq ingatsikkiartorpoq.

- Olesjkymi pissutsit ilungersunarput. Illoqarfik sorsuffiusumiittoq ajunaarnersuaqarfiusinnaavoq. Oleskymi innuttaasut amerlanersaat utoqqaapput nakorsamit ikiorneqarnissaminnik, nakorsaatinik, nerisassanik imermillu minguitsumik pisariaqartitsilluinnartut, Melania Trump oqarpoq.

Paavi Leo illoqarfik pillugu Ruslandip præsidentianut Vladimir Putinimut sapaatip-akunnerata siuliani sianerpoq.

Tassani paavi illoqarfimmi inunnik isumaginninnerup qanoq innera "isumakuluutigilluinnarlugu“ oqaatigaa, Putinilu kajumissaarlugu ikiuutit nerisassallu illoqarfimmut tikiunneqarnissaannut aamma innuttaasut namminneq kajumissutsiminnit qimarnguffissaannik akuerseqqullugu.

Paavi Ukrainep præsidentianut Volodymyr Zelenskyjimut tamatuma kingorna sianerpoq, tassanilu illoqarfimmi pissutsit pillugit isumakuluutini oqaatigeqqippaa.

Ukraine Ruslandillu, Ukrainep illoqarfimmut tiguaqqikkusutaanut pilersuinerup unittooqqaneranut imminnut pisuutipput.

RITZAU/ REUTERS