Utoqqaat angerlarsimaffiiniittut soraarnerussutisiatik tamakkiisumik tigusalissappatigit ima akeqassaaq
Utoqqaat angerlarsimaffiiniittut soraarnerussutisiaqarnerminnik tamakkiisumik pissarsissappata nunap karsianut millionilikkaanik akeqassaaq. Ulloq manna utoqqaat utoqqaat angerlarsimaffianni najugaqartut soraarnerussutisiamik 46 procentiinnai pissarsiarisarpaat.
Utoqqaat angerlarsimaffiiniittut siunissami soraarnerussutisiatik tamakkiisumik tigusalerpatigit tamanna nunatta karsianut aningaasartuutaangaatsiassaaq.
Toqqorsivimmiit assi: Leiff Josefsen
Utoqqalinersiallit 405-it utoqqaat angerlarsimaffianni allaniluunniit najugaqartut 2025-mi taama amerlassuseqartut Naalakkersuisoq Aqqaluaq B. Egede paragraf 37 naapertorlugu Naleqqami ilaasortamut Jens Napatôkimut akissummini ilisimatitsivoq.
Utoqqaat illuannut allamulluunniit pisortanit nerisaqarnermut ineqarnermullu akiliutigineqartartumut nuukkuni utoqqalinersiami tunngaviusumik aningaasarsiat 54 procentii missaannik ikilisinneqartarput. Oqaatigilluaannarlugu soraarnerussutisiat malunnaatilimmik appariaateqartarput.
Utoqqaat soraarnerussutisiaminnik tamakkiisumik pissarsissappata tamanna pisortanut qanoq akeqassanersoq Jens Napatôkip Naalakkersuisunut saaffiginnissummini paaserusuppaa.
Aningaasartuutit qaffakkiartortut
Tamanna nunap karsianut 45 million koruuninik naleqassasoq akissummi allassimavoq.
Aningaasartuutit taakku ukiuni aggersuni qaffarujussuarumaartut aammattaaq nalunaarutigineqarpoq.
Utoqqalinersiallit ukiuni tulliuttuni amerliartornissaat pissutigalugu ukiut tallimat qaangiuppata 2030-mi aningaasartuutit 57 million koruuniussasut naatsorsuisoqartarpoq. Aningaasartuutillu ukiut qulit qaangiuppata 67 million koruuniussasut naatsorsuutigineqarpoq. Kisitsisit taakkua "annertuumik nalorninartorsiortitsisut" maannamuugallartoq naqissuserneqarpoq.
