ILINNIARNEQ
Uumasut nakorsaattut ilinniakkaminnik naammassinnittut
Ivalu Kleemann aamma Aviaaja Petersen Kalaallit Nunaanni uumasunut nakorsaasutut siulliit ilaanniillutik ilinniagaqarput. – Pissanganartorujussuuvoq, Aviaaja Petersen oqarpoq, taassumalu Kalaallit Nunaannut uternissani uumasullu nakorsaatut sulilernissani qilanaaraa.
Aviaaja Petersen (talerperleq) aamma Ivalu Kleemann Kalaallit Nunaanni uumasut nakorsaasutut ilinniakkaminnik naammassinnittut siulliit ilagaat.
Assi: Nammineq pigisaq
Uumasut nakorsaattut ilinnialissagaanni uumasunik nuannarisaqartariaqarpoq. Taamaappallu ilinniagaq nuannerluinnartuussaaq
Aviaaja Petersen oqarpoq, taassuma ilinniakkani naammassillugu
allagartani januaari aallartilaartoq tiguaa, maannalu imminut uumasut
nakorsaatut Københavns Universitetimi ilinniagalittut
taasinnaalerpoq. Ivalu Kleemann allagartartaaqqammersoq peqatigalugu Københavns Univeritetimi
Kalaallini siulliit ilaanniillutik ukiut tallimat affarlu ilinniagaq
ingerlassimalerlugu uumasut nakorsaattut naammassipput.
Aviaaja Petersen Nuummi uumasut nakorsaqarfiani uumasunik mikisunik suliaqarniarluni takorluugaqarpoq, aallaqqaammulli Danmarkimi misilittakkaminik katerseqqaarnissani kissaatigaa.
Uumasut nakorsaattut ilinniagaqarnermi atuartitaanerpassuit ingerlanneqartarput, ingammillu bacheloritut ilinniarnermi atuagassarpassuaqartarluni. Tamanna piareersimaffigineqassaaq, Aviaaja Petersen oqarpoq, taanna ukioq manna januaarimi allagartartaarpoq.
Assi: Nammineq pigisaq
Danmark-imut nuunneq
Uumasut nakorsaattut ilinniarneq imaannaanngitsuuvoq.
– Uumassusililerisutut ilinniagaqarnissara eqqarsaatigisimavara.
Ilisimatusarfimmilu uumassusililerisunngorniarfiup aallartinnissaa
utaqqigaluarpara, naatsorsuutigisanniillu utaqqinera sivisunerummat Nuummi peqqissaasunngorniarlunga aallartippunga. Inunnik passussinermiit uumasunik
passussinissara orniginerullugu tamassuma ingerlanerani paasivara, taamaalillungalu uumasunut nakorsanngorniassallunga Danmarkimut nuuppunga, Aviaaja Petersen
oqaluttuarpoq.
– Alloriarneq annertoqaaq. Naak affarmik qallunaajugaluarlunga Københavnimi inuppassuaqarfiusumi kikkullu tamarmik nipitoorsuarmik oqaluttartut akornanni najugaqalerneq allaanerulluinnarpoq. Ukiumi siullermi Nuummikkama ikinngutimma ilaanni najugaqarpunga, tamannalu nuanneqaaq, Danmarkimimi najuqalerninniit ukiup ataatsip missaani tunniarsarivunga.
Uumasut nakorsaatut sulilluni ullut suliffiusut nuannertuaannartut isumaqarpunga
Aviaaja Petersen, uumasunut nakorsanngorlaaq
Ilinniagaq sakkortooq
UUMASUT NAKORSAATTUT ILINNIARNEQ (VETERINÆRMEDICIN)
Københavnip Universitetiani Frederiksberg Campusimiittumi Aarhusillu Universitetiani Campus Viborgimiittumi uumasut nakorsaattut ilinniartoqarsinnaavoq.
Ilinniarneq ukiuni pingasuni ingerlanneqartarpoq, taakkunani bacheloritut ukiuni pingasuni ilinniarneq aamma kandidatitut ukiuni marlunni affarmilu ilinniartoqartarpoq. Katillugit ukiut tallimat affarlu ilinniarfiuvoq.
Ilinniartut uumasut nakorsaatut sulinermut tunngasut tamaasa ilinniartarpaat, aammali immikkut ilinniarnissaminnut periarfissaqarput.
Uumasut nakorsaattut ilinniagaqarsimagaanni assersuutigalugu uumasunut nakorsiartarfinni, nerisassanik tunisassiornermi nakkutilliisutut imaluunniit uumasunik tunisassiornermik suliaqartutut sulisoqarsinnaavoq. Kalaallit Nunaanni Nuummi maannamut ataasiinnarmik uumasunut nakorsiartarfeqarpoq. Taassumalu saniatigut nerisassanik tunisassiornermi nakkutilliisoqarfik ukioq 2025 aallarnerfigalugu Nuummi allaffimmik ammaavoq.
Kalaallit Nunaannit ilinniagaqartut immikkut ittumik aaqqissuussaq aqqutigalugu qinnuteqarsinnaapput.
Qinnuteqaatit kingusinnerpaamik marsip 15-ianni ullup qeqqartinnagu tiguneqassapput.
Qinnuteqarnissamut piumasaqaatit qinnuteqarfissarlu uani atuarsinnaavatit.
Aviaaja Petersenip ilinniakkani 24-nik ukioqarluni aallartippaa, amerlasuut ilinniarnertuunngorniarfimmit toqqaannartumik aallartimmata angajullersanut ilaavoq. Tamannali iluaqutaaginnartoq isumaqarpoq.
– Atuaqatikka allat ilinniarnertuunngorniarfimmiit naammassiniariarlutik ilinnialersut ilinniarnertuunngorniarfimmiit naammassininniit ukiut tallimat qaangiummata aatsaat ilinnialerpunga. Angajullersaanerali uannut pitsaaquteqarpoq. Eqqissisimallungalu inunnut allanut attaveqarneq pillugu aalajangersinnaavunga. Ikinngutiginerpaasakka Danmarkimi aamma ilinniagaqartut kisiisa peqatigisarpakka. Atuaqatikka aamma ullut tamaasa atuarfimmi naapittarpakka. Piumasunulli ilinniartut allat peqatigalugit sammisaqatigiinnissamut periarfissarpassuaqarpoq.
Uumasut nakorsaattut ilinniagaqarnermi atuartitaanerpassuit ingerlanneqartarput, ingammillu bacheloritut ilinniarnermi atuagassarpassuaqartarluni. Tamanna piareersimaffigineqassaaq, Aviaaja Petersen oqarpoq.
– Soqutiginnittuugaannili tamanna ajornanngilaq, kandidatinngorniaraannilu sulinertaqartorujussuummat aallaqqaammut bamsit uumasullu toqungasut sungiusaatigalugit aallartittarpugut, naggataatigullu uumasunik passussisarpugut. Tamanna pissaganarluinnarpoq.
Aviaaja Petersen Ivalu Kleemannilu Qimmeq Health-imik suliniummut atatillugu Kalaallit Nunaannut arlaleriarlutik angalasarput, tassani qimmeqarfinni uumasunut nakorsiartarfiit pilersinneqaqqammerput. Assimi qimminut nakorsaaneq Emilie Ranberg peqatigineqarpoq.
Assi: Nammineq pigisaq
Kalaallit Nunaanni praktikkerneq sulinerlu
Aviaaja Petersen Ivalu Kleemannilu Nuummi Donnas Dyreklinikimi suliffimmik misiliipput, Københavnillu Universitetiani Qimmeq Healthimik suliniummi suleqataagamik qimmit qimuttut peqqissuunissaat pitsaanerulernissaallu uumasut nakorsaasa suliniutaanni ilaatigut nunaqarfinni illoqarfinnilu qimminut nakorsiartarfiugallartunik pilersitsinikkut anguniarneqarpoq.
Aviaaja Petersenip uumasut mikinerit soqutigineruai. Taamaammat uumasunut nakorsanngorniarnini nerisassanut oqartussani sulinermik tapertalersinnaallugu takorloorpaa. Inuusuttut amerlanerusut uumasunut nakorsaatut ilinniagaqarnissartik eqqarsaatigilissagaat neriuutigaa.
– Uumasut nakorsaattut ulluinnarni suliffiusartut pikkunaatsuunngitsut isumaqarpunga. Periarfissat amerlaqaat, assaallu atorlugit sulineq, suliassanik suliaqarneq uumasullu peqqissuunissaannut ikiuutaanissaq nuannarigaanni suliffik pitsaalluinnarpoq, Aviaaja Petersen oqarpoq.
