Vejlemiut kuultinnapput
Ukioq manna Tusami naliliisartut ulappuput.
Erinaq Kalattoortartullu ukiumoortumik unamminermi ajugaammata nuannaartunnguaqarpoq.
Assi: Jesper Hansen
Inuit peqatigiiffiat ukiumoortumik unammiuaarnermi Tusariarlinngooq (tusa) qaaqqusimmat Vejlemi Erinaq Kalattoortartullu arfininngormat bingorlutillu nipilersorput.
Ajugaasut atugaat Eqqumiileqaagut tassaavoq kalaallisut rap nutaaliaasoq, nutsugiamik, qilaammik, sianaarpalummik, kazoomik, guitarimik tamburinimillu nipilersorneqartoq.
Assi: Jesper Hansen
Erinarsoqatigiit Vejlemeersut erinarsuutinut
nipilersuuserneqanngitsuni Ukiakkut
Tarrajussereerpoq erinarsorlugu unamminermi ajugaassutigaat, aamma erinarsuutit nipilersuutinik
ingiorneqartuni unamminermi Eqqumiileqaagut, kalaallisut rap-imik
nutaaliaasumik tusarnaartitsineq, ajugaavoq.
Vejlemi Erinaq
Kalattoortartullu sumiiffimmi unammiffigisaminni iluaquteqarput,
unamminerimmi Vejlemi ingerlanneqarmata. Tusali isiginnaartunit
nalilersorneqanngilaq. Erinarsuutit naliliisartunit Danmarkimi kalaallit
peqatigiiffiiniit tamanit sinniisulinnik nalilerneqartarput, taamaalillutik kikkut tamarmik periarfissaqarput.
Unammisut
amerlammata piumasaqaatillu qaffasilluinnarneri peqqutaallutik
naliliisartut piffissami sivisuumik aalajangerneq ajulersimapput. Taamaammallu nereqatigeereernerup kingorna ajugaasut aatsaat suaarutigineqarput. Nalinginnaasumik siusinnerusukkut suaarutigineqartaraluarput.
Erinarsoqatigiit erinarsorneranni Trumpip siorasaarinera aamma Kalaallit Pigaat sammineqangaarput.
Assi: Jesper Hansen
Unammineq pissaganartoq
- Aalajangernissaq
ilungersunartorujussuuvoq, Inuit siulittaasuat Camilla Siezing
oqaluttuarpoq.
- Erinarsuutit
nipilersuutillit unammissutigineqarneranni unammisut
naligiiaattupilussuupput, uuttortaallu atoqqajanneqarpoq. Ajugaasulli
qularutissaanngivipput.
- Ajugaasut
suaarutigineqarneranni tusarnaarianit nuannaarutigineqartoq
ersaattaanneranni tusaaneqarsinnaavoq.
Tusa Vejlemi
ingerlanneqarnera nutaajuvoq. Ukiorpassuarni unammineq Hotel
Pejsegårdenimi illoqarfimmi mikisumi Brædstrupimi Silkeborgip
Billundillu akornanniittumi ingerlanneqartarnikuuvoq.
- Tusa Vejlemut
nuupparput peqataasunut namminneq biilertussaanngitsunut
ajornannginnerummat.
Inuit aamma Vejlemut
nuunnertik iluaqutigaat.
- Ukioq manna
unamminermut billetsit 250-it tunineqarput siorna 170-t, Inuit
aningaaserisuat Johnhard Telling nalunaarpoq.
