Venezuelap illoqarfiisa pingaarnersaannik nunallu immikkoortuinik arlalinnik USA saassussivoq
Venezuela aamma USA-p præsidentiata uppernarsarpaat nunami Amerikami kujallermiittumi USA saassussisoq.
Inneq pujorlu Caracasimi arfininngornermi unnuakkut nunap nalunaaqutaq malillugu. Assi videomiit tigusaavoq, Reutersip inummit attuumassuteqanngitsumit pissarsiarisimasaanit.
Asseq: Video Obtained by Reuters/Reuters
Venezuela tallimanngornerup arfininngornerullu akornanni unnuakkut, sumiiffimmi nalunaaqutaq malillugu USA-mit saassunneqarsimavoq.
Reuters naapertorlugu, tamanna Venezuela-p naalakkersuisuisa nalunaarutigaat, aamma USA-p præsidentia, Donald Trump, saassussineq social media Truth Social-imi allaatigalugu uppernarsarpaa.
Saassussinerit illoqarfiit pingaarnersaannut, Caracas, kiisalu La Guaira, Miranda aamma Aragua-mut sunniuteqarput.
Inuit ajoqusersimanersut imaluunniit toqutaasoqarsimanersoq nalunaarutigineqanngilaq.
USA-p saassussineranut siunertaavoq, Venezuela-p naalakkersuisuisa oqarnerat naapertorlugu, nunap uuliaataanut pisuussutaanullu allanut isersinnaanissaq.
Arfininngornermi ullaassakkut Fuerte Tiunami, Venezuelap sakkutooqarfiisa annersaanni, inneq pujorlu takuneqarsinnaapput.
Foto: Luis Jaimes/Ritzau Scanpix
Saassussinerit kingunerisaanik Venezuela-p præsidentia, Nicolas Maduro, nunami immikkut ittumik killilersuisoqarnissaanik nalunaaruteqarpoq.
Tassunga ilanngullugu Venezuela noqqaassuteqarpoq FN-ip isumannaallisaanermut ataatsimiititaliaanut aamma FN-ip pisortaaneranut, saassussinerit isornartorsiorneqarnissaat nalunaarutigineqassasoq.
Trump-ip oqarnera naapertorlugu Maduro tigusarineqarsimavoq, Venezuela-millu nuliilu peqatigalugit timmisartumik aallarunneqarsimallutik.
Aappariit sumiinnersut uuma allaaserisap naammassinerani ilisimaneqanngilaq.
USA-p Colombiami aallartitaqarfiata, amerikamiut Venezuela-miittut ikiorniarlugit, amerikamiut tamarmik Venezuela piaarnerpaamik qimassagaat kaammattuutigaa.
Tassunga ilanngullugu amerikamiut killeqarfinnut tamanut pinaveersaarnissaat kaammattuutigineqarpoq, aallartitaqarfik nittartakkamini allappoq.
Tusagassiorfiit arlallit arfininngornermi ullaakkut danskit nalunaaqutaat malillugu nalunaarput qaartartumeerisoqartoq aammalu sumiiffinni Caracasimi sakkutooqarfimmut qanittumiittuni innaallagissamik qamittoortoqarsimasoq.
Tamatuma saniatigut nalunaarutigineqarpoq timmisartut appasissumik timmisut aammalu minnerpaamik arfineq-marlunnik qaartartumeerisoqarsimasoq nalunaaqutaq 02.00 nunap nalunaaqutaa malillugu.
Tassunga ilanngullugu La Guaira aamma Mirandami qaartartumeerisoqarsimasoq tusagassiorfiit arlallit allaaseraat, sumiiffiit pineqartut tamarmik Venezuela sineriaaniittuupput.
Qaammatini kingullerni USA-p præsidentia, Donald Trump, Madurumut sakkortuumik tatisivoq, aammalu USA-p manerassuarmi aammalu Caribiap imartaani umiarsuit arlallit saassussimavai.
USA-p umiarsuarni ilaasut ikiaroornartunik USA-mut eqqussuisimasutut pasivai - ilaatigut Venezuelameersuunerarlugit pasilliuteqarluni.
Akerlianik Madurop USA pisuutippaa Venezuelami naalakkersuinikkut allanngortitsiniarsarinerarlugu, nunap uuliaatai annertuut pissarsiariniarlugit.
Donald Trump arlaleriaqaluni mianersoqqusivoq, Venezuelami nunami saassussinissat eqqarsaatigineqarsinnaasut, tamatumalu ilutigisaanik USA-p Venezuelamut akitsuutitigut annertusaasimavoq kiisalu USA-p nunap immikkoortuani najuunnera annertusimallugu.
Ataasinngornermi USA-p præsidentia oqaatigaa, USA-p Venezuelami umiarsualivimmi talittarfik aserorsimallugu, tamanna Maduromit uppernarsarneqanngilaq.
