Vivian: Alloriarnissama tullia nalilersortariaqarpara

Naalakkersuisoqatigiinnit D, IA, S aamma A Siumut ilaajunnaarpoq. Siumut naalakkersuisoqatigiinni suleqataajunnaarnera isumaqarpoq Vivian Motzfeldt nunanut allanut tunngasunut naalakkersuisuujunnaartoq.

Vivian Motzfeldtip pisut tupaallaatigai uggoralugillu:

- Partiit qalipaataanik ersitsisoqarnissaanut maanna piffissaasorinngilara. Inuiaqatigiit ataatsimoornissaat, taavalu nukiit katersorneqarnissaat uanga anersaariuarpara uanilu aalajangernermi taanna takusinnaanngilara, Vivian Motzfeldt (S) Siumut naalakkersuisoqataajunnaarnerata kingorna Sermitsiamut oqarpoq.

- Aamma uanniippoq nalilersuinissaq, soorunami suliagut aamma partiimi tunngavigut tarrarsorfigisinnaasariaqarpagut, Sermitsiamut oqarpoq.

Inuiaqatigiit pillugit politikkimik sulisoqassasoq

Vivian Motzfeldt qularutiginagu oqaatigaa politikkimik suliaqarnermi inuiaqatigiit pitsaasumik sullinneqarnissaat pingaarnerpaasoq. Nunanut allanut tunngasunut naalakkersuisuunermini nunatta pingaartitai siunertaalu pillugit, ilaatigut USA-mi J. D. Vance ataatsimeeqatigisimavaa.

- Naalakkersuisutut tunuartariaqalernissara ullaaq manna aatsaat paasivara. Pisut ingerlarngat aamma siulersuisuunerit aalajangersimanerat soorunami ataqqivara. Kisianni oqaatigerusuppara akisussaaffik annertoorujussuaq tigummiarsimasara tamatigut tigummiarsimagakku innuttaasut pillugit, nunarput pillugu, oqarpoq.

Maanna taava sussanerluni aperineqarami Vivian Motzfeldt nalorninngilaq:

- Misigisimavunga nukiit ataatsimoorfissamut atugassaraluagut tassunga atunngitsut. Uanga isumaga tassaniippoq. Aamma uanniippoq nalilersuinissaq, soorunami suliagut aamma partiimi tunngavigut tarrarsorfigisinnaasariaqarpagut. Naleqartitat taakku uanga pingaartinnerusakka; oqaq soorunami politikkimi sulisussaavoq, kisianni pingaarnerpaaq oqaq aamma malitseqartussaavoq assannik sulisunik, Vivian Motzfeldt oqarpoq.

Kim Kielsen: Apeqqummi tassani isumaqatigiinngilagut

Naalakkersuisuni ilaasortat marluk, tassa Anna Wangenheim aamma Naaja Nathanielsen Folketingimut qinigassanngortinnerat pissutigalugu Siumut Naalakkersuisoqataajunnaarpoq. Qinigassanngortittut taakku marluk qinigaassagaluarunik pisussaanertik malillugu naalakkersuisunit atuuffimminnit tunuartussaapput Naalakkersuisoqatigiilli iluani apeqquserneqarpoq ilumut naalakkersuisuutigaluni qineqqusaartoqarsinnaanersoq.

Inatsisartut siulittaasuata apeqqut tamanna Siumup iluani isumaqatigiinngissutaasoq isertuunnagu oqaatigaa.

- Qulequttami uani isummagut assigiinngillat. Inatsisinik assigiinngitsunik unioqqutitsisoqarsimasuuppat, soorunami aamma uanga sakkortuumik qisuariarsimassagaluarpunga. Kisianni inatsit taanna unioqqutinneqanngilaq. Tassanili apeqqummi isumaqatigiinngilagut, Kim Kielsen Sermitsiamut oqarpoq.

Kim Kielsenip aamma erseqqissarpaa qineqqusaareernerup kingorna Naalakkersuisut iluanni tatigeqatigiinnerup piuleqqinnissaanut annertuumik suliassaqartoqassasoq.

Kim Kielsenili partiiminit aninialersaarnersoq aperineqarami qularnani akivoq suli tunuliaqutsiilluni, taamaattorli aalassassimalluni:

- Ippassaq aalassannikooqaanga. Ippassaq pisut eqqarsaatigalugit aalassannikooqaanga, itisiliinani akivoq.

Kim Kielsen naalakkersuisoqatigiinnit maanna atuuttunit ivertinneqarluni Inatsisartuni siulittaasuuvoq. Inatsisartuni siulittaasutut atuuffik inissisimaffigiinnassaneraa suli qulakkeerneqanngilaq. 

Tamatumunnga Kielsen ima akissuteqarpoq:

- Inatsisartut ataatsimeeqqilerunik tamatumunnga aalajangerumaarput, oqarpoq. Inatsisartut upernaakkut ataatsimiinnerat 14. april aallartissaaq.