Vivian NATO-mi ataatsimiinnerup kingorna: Issittumi isumannaallisaaneq oqaluuseraarput
Nunanut allanut tunngasunut naalakkersuisoq Vivian Motzfeldt illersornissamullu ministeri Troels Lund Poulsen NATO-mik ataasinngornermi ataatsimeeqateqarnermi Issittumi isumannaallisaanissaq sammineqartoq Issittumilu suliniuterpassuit NATO-p ilisimagai, taakku tusagassiortunik katersortitsinermi oqarput.
Assi: TV2
NATO-p Issittumi isumannaallisaanermut suliniutit pillugit ullumi ataatsimiinnerani ilisimatinneqarpoq. Illersornissamut ministeri Troels Lund Poulsen (V) nunanut allanut tunngasunut naalakkersuisoq Vivian Motzfeldt (S) peqatigalugu Kaja Kallas Mark Ruttelu NATO-mi ataatsimeeqatigereernerani ataasinngornermi tusagassiortunik katersortitsinermini oqarpoq.
Danmarkimiit Kalaallit Nunaanniillu Nato-p Issittumi suliaqarnissaa pillugu Nato-p generalsekretærianut Mark Ruttemut siunnersuuteqartut, Troels Lund Poulsen ataatsimiinnerup kingorna oqarpoq.
- Issittumi isumannaatsuunerup pingaaruteqarnera erseqqissarusuppara. Pissutsini makkunani ajornakusoortuni tapersersoqatigiinnerput nuannaarutigalugu oqaatigisinnaavara. NATO-mi generalsekretærip Issittumi isumannaatsuunissaq qulakkeerniarlugu suliniuteqartoqarnera aamma qularutiginngilaa, Troels Lund Poulsen oqarpoq.
Europami Kommissionimi siulittaasup tulliata Kaja Kallasip NATO-milu generalsekretærip Mark Ruttep isumannaallisaanerup pingaaruteqarnera nalunngikkaat, Vivian Motzfeldt oqarpoq.
- Ataatsimiinneq sivisullunilu pitsaasuuvoq. Kaja Kallassip Mark Ruttellu Issittumi isumannaallisaanerup naalagaaffeqatigiinni pimoorunneqarnera nalunngilaat. Oqaloqatigiinnerup ingerlanera qulakkeerlugulu Issittumi isumannaallisaanermut tunngasunik unammilligassanik aaqqiisussamik suleqatigiissitaliortoqarnera oqaatigaa, oqarpoq.
Annikitsualuit oqaluuserineqartut
Mark Ruttemik ataatsimeeqateqarneq pitsaasoq, annikitsualuillu arlallit eqqartorneqartut, Illersornissamut ministeri Troels Lund Poulsen tusagassiortunik katersortitsinermi oqarpoq:
- Suliaq una manngertitarnarpoq, naalagaaffeqatigiinnermut tunngaannarani aammali Europamut Nato-llu siunissaanut tunngammat, taamaattumik isumaqanngilanga oqaloqatigiissutigisimasavut saqqummiuttariaqarlugit. Generalsekretærip pisut ilungersunarnerat ilisimaarigaa malugaara, naalagaaffeqatigiit Nato-milu unammilligassat eqqarsaatigalugit, Troel Lund Poulsen oqarpoq.
- Amerikamiut sapaatip-akunnerata siuliani oqaloqatigineranni siunniunneqartoq aalajangiusimasariaqarparput, naak nalunngikkaluarlugu ajornakusoorsimasoq, oqarpoq.
Vivian Motzfeldtip USA-mik suleqateqarnissaq suli periarfissaasoq erseqqissaatigaa:
- Suleqatigiinnissaq eqqarsaatigalugu ammajuaannarpugut. Issittumi isumannaallisaaneq pineqartillugu Amerika avaqqunneqarsinnaanngilaq. Amerikami isumannaallisaaneq uagutsinnut aamma tunngassuteqarpoq. Ajornartorsiummut matumunnga aaqqiissutissanik qulakkeerinnittussamik suleqatigiissitalioreerpugut, attaveqaatillu eqqortut atorlugit oqaloqatigiinnissamut ammajuaannarluta, Vivian Motzfeldt oqarpoq.
Naalagaaffeqatigiinneq kisimi pineqanngitsoq
Troels Lund Poulsen naalagaaffeqatigiinneq kisimi pineqarunnaartoq isumaqarpoq:
- Europami isumannaatsuunissaq pineqarpoq, tamannalu manngertitarnarpoq. Mark Ruttep tusarnaarniarluta nukippassuit atorai maluginiarpara, oqarpoq.
Troels Lund Poulsen USA Europami isumannaatsuunissamut pisariaqartoq oqarpoq, aammali præsident Donald Trumpip oqaasiisa ilaat "annernaqisut" oqaatigalugu.
