Vivian oqilisimaartoq: Neriuutiga annerpaaq tassaavoq pissutsinut nalinginnaasunut uteqqinnissarput

Kalaallit Nunaat/Danmark aamma USA naapeqatigiittussanngorput.

Nunanut allanut tunngasunut Naalakkersuisoq Vivian Motzfeldt aamma nunanut allanut ministeri Lars Løkke Rasmussen, amerikami nunanut allanut ministerimik Marco Rubio-mik naapitsisussanngormata.

Sumiiffik piffissarlu suli oqaatigissallugit siusippallaarpoq, naalakkersuisoq nunanut allanut tunngasunut Vivian Motzfeldt nuannaarluni oqilisimaarlunilu oqarpoq:

- Maanna USA-mut toqqaannartumik oqaloqateqarnissarput qulakkeerparput, soorunami nuannaarpunga oqiliallallungalu maannalu naapissinnaaleratta oqaloqatigiillutalu, aammalu neriuutiga annerpaaq tassaavoq ataatsimeeqatigiinnerput attaveqatigiinnitsinnut pissutsinullu ilisimasatsinnut uteqqilluta ingerlassinnaaleqqissagipput, Vivian Motzfeldt Sermitsiarmut oqarpoq.

"Kalaallit Nunaat USA-mik pisariaqartitsivoq USA-lu Kalaallit Nunaannik pisariaqartitsilluni"

Kalaallit Nunaanniit Marco Rubio-mut sunik apuussissavit?

- Oqariartuutigerusutara pingaarnerpaaq tassaavoq Kalaallit Nunaat USA-mik pisariaqartitsivoq USA-lu Kalaallit Nunaamik pisariaqartitsilluni, Issittumi isumannaallisaanermut tunngatillugu. Ukiorpassuit ikinngutigiilluta suleqatigiiullutalu ingerlasimavugut, suleqatigiissimanerlu tamanna toqqissisimanartumik ingerlanikuulluni, tamannalu tunngavigalugu tatigeqatigiilluta ataqqeqatigiillutalu ingerlaqqinnissarput angorusunnaqaaq.

- Tamatuma saniatigut erseqqissarusuppara Kalaallit Nunatta tungaaniit suli kissaatigigipput Kalaallit Nunaata USA-llu akornanni suleqatigiinnitta annertusarneqarnissaa ilaatigut Joint Committee aqqutigalugu, Vivian Motzfeldt akivoq nangillunilu:

- Aamma paaserusupparput sooq USA taamak sakkortutigisumik oqaaseqarnissaminut pisariaqartitsisimanersoq, siunissami imminnut paatsooqatigiittannginnissarput pillugu, ikinngutigiippugummi suleqatigiillutalu.

Taamaakkaluartoq isumaqarpit sakkortuumik sioorasaarerpaluttumillu oqalunneq unitsinneqarsinnaasoq pissutsillu nalinginnaasunngortinneqarsinnaasut?

- Neriuppunga ataatsimiinneq maanna pisussanngortoq ataatsimiinnernik allanik malitseqarumaartoq, USA-mik oqaloqateqarusuppugut aammalu suleqatigeeqqinnissarput kissaatigaarput aammalu pissutsit nalinginnaasunngortinneqarnissaat kissaatigaarput. Kisianni aamma qulakkeerneqarsinnaappat USA-p allatut oqaaseqarluni allatut iliuuseqarnissaa misigeqqissanngikkipput, ukiut ataatsip ingerlaneranni misinnartarmat siumut ataatsimik alloriaraangatta aqaguani kingumut marlunnik alloriartartugut.

"Kalaallit Nunaat Danmarkip kunngeqarfiata ataaniippoq inatsisillu malinneqartariaqarput"

Inatsisartuni illuatungiliuttut kaammattuuteqarnikuupput Naalakkersuisut USA-mik Danmarki ilanngunnagu ataatsimeeqateqaqqullugit, kisianni tamanna pisinavianngilaq:

- Politikkeritut inatsisit atuuttut malillugit sulinissarput pisussaaffigaarput aammalu kunngeqarfimmi suliassat qanoq aaqqiivigineqartassasut malittarisassaqarpugut. Namminersornerullutik Oqartussat inatsisaat atuuppoq, aammalu Namminersornerullutik Oqartussat inatsisaanni tunngaviusumik periaatsit tallimat malinneqartussaapput, naalagaaffinngortigata malitassagut. Tamanna eqqaamassavarput, allatut iliorutta inatsisinik unioqqutitsissagaluarpugut, aammalu inatsisit maleruagassallu qaangiinnarsinnaanngilagut, qanorluunniit namminerisatsinnik naalakkersuinissarput kissaatigigaluarutsigu.

- Sulissutigaarput angusaqarlutalu annertunerusunik pisinnaatitaaffeqalernissarput assersuutigalugu naalagaaffiit marluk akornanni attaveqaqateqarsinnaanerput, inatsisinut naapertuuttumik pisussaaffitsinnik unioqqutitsinngitsunik, allatullu ilioqattaalissagaluarutta nunatut tatiginassuserput innarlertussaavarput. 

Tassa Amerikamiut nunanut allanut tunngasunut ministeriat ataatsimeeqatigineqartussanngorpoq sapaatip akunnerata tulliani. Vivianillu paasissutissiissutigaa piffissaq sumiiffissarlu kingusinnerusukkut nalunaarutigineqarumaartut.