Vivian USA-miit tikilluartinneqartoq
Vivian Motzfeldt Nuummut marlunngornermi tikimmat tapersersuisorpassuit niuffiorput.
Vivian Motzfeldt mittarfiup illutaanut isertoq.
Assi: Oscar Scott Carl
Nunanut allanut tunngasunut naalakkersuisoq Nuummi marlunngornermi tikippoq, inuppassuillu tapersersuinertik takutinniarlugu niuffiorput.
Vivian Motzfeldt USA-mi præsidentip tullianik J. D. Vancemik nunanullu allanut tunngasunut ministerimik Marco Rubiomik sapaatip-akunnerata siuliani ataatsimeeqateqarnermi Kalaallit Nunaat sinnerlugu peqataavoq, tamannalu maluginiarneqarsimavoq.
Vivian Motzfeldt nuannaartunik erfalasulisartunillu tikilluaqquneqarpoq.
Assi: Oline Inuusuttoq Olsen
Mittarfimmut takkuttut ilagaat Regine Biilmann.
Sermitsiamullu ima oqarpoq:
- Nuannaarpugut. Pikkorilluni nunarput pillugu sulilluarmat tikilluaqquniarlugu maaniippugut.
Vivian Motzfeldtip ernera Inuk Wæver Johansen niuffiortut ilagaat.
Anaanami Marco Rubio ataatsimeeqatiginissaanut annilaangallunilu pissangasimalluni Sermitsiamut oqaluttuaraa. Præsidentip tulliata J. D. Vancep ataatsimiinnermut peqataasussanngortoq paasigamiuk aamma annilaanganerulersimavoq.
Ataatsimiinneq naammassimmat oqiliallassimalluni, anaananilu tulluusimaarutigalugu Inuk Wæver Johansen oqarpoq.
Inuk Wæver Johansen nassuiaavoq anaanani Vivian nunanut allanut tunngasumik suliaqarluni angalangaangat angerlamut tikinnissaa erinigisarlugu aamma pissangangisarlugu.
Kingullermik arni angalareerluni tikimmat, Inuk angunnilu kisimik niuffiorput. Maanna immikkut nuannerpoq tulluusimaarporlu anaanani niuffiorneqarluarmat, USAmi ataatsimeereerluni tikilermat.
Inuk Wæver Johansen anaanami pingaarutilimmik angalanera pissutigalugu annilaangasimalluni pissangasimallunilu oqarpoq.
Foto: Oline Inuusuttoq Olsen
Vivian Motzfeldt tikilluaqqusineq killitsissutigeqalugu Sermitsiamut oqarpoq.
- Qujanarujussuaq, naalakkersuisoq oqarpoq.
Qanoq misigisimavit?
- Misigissutsit tamaasa! Pilluaqaanga, aammali sulissarilikkatta suuneri ilisimaaralugit.
- Nunatta toqqissisimaleqqinnissaa anguniarlugu sapinngisarput tamaat sulivugut
Niuffiortorpassuarnut oqaaseqatsiarpoq. Ilaatigut ima oqarpoq:
- Maannakkut atukkavut ilungersunarput. Ullut tamaasa sulivugut. Oqaloqatigiinneq aallartipparput, toqqissisimanartunngornissaatalu angunissaa suli sivisuvoq. Pingaaruteqarnerpaavorli maani toqqissilluta inuuleqqinnissarput siunertaralugu oqaloqatigiinneq aallartinneqarmat. Tamanna uummatitsinniit ullut tamaasa sulissutigaarput.
- Nunatta sungiusimasatsitut toqqissisimanartunngoqinnissaa sapinngisatsinnik sulissutigaarput. Ulluinnatsinnut sungiusimasatsinnut uteqqinnissarput tamaviaarluta anguniarparput.
Inuppassuit tusagassiortullu Vivian Motzfeldimut niuffiorput.
Assi: Oline Inuusuttoq Olsen
