Vivianip paavi Leo ilassivaa
Naalakkersuisoq Vivian Motzfeldt (S) Romimi Arctic Circle Forumimi sapaatip-akunnerani matumani ingerlanneqartumi pingaarnertut oqalugiartut ilagaat. Angalanini iluatsillugu paavi ilassivaa.
Vivian Motzfeldt Peterspladsimi paavinimit immikkut qaaqqusaavoq.
Assi: Naalakkersuisut.
Romimi Italiamiittumi ataatsimeersuarneq Arctic Circle Forum sapaatip-akunnerani matumani marlunngornermi pingasunngornermilu ingerlanneqarpoq.
Nunanut allanut tunngasunut naalakkersuisoq Vivian Motzfeldt (S) oqalugiartut pingaarnerit ilagaat, taassumalu periarfissaq atorluarlugu Kalaallit Nunaata isumaa erseqqissumik oqariartuutigalugulu piffissami kingullermi unammilligassaqarfiusumi nunat tapersersuisut qutsavigai:
- Piffissami unaminartumi pingaartutut isigaara nunatsinnut tapersersuillutik nalunaaruteqarsimasut qanimut oqaloqatigisarnissaat aammalu avatitsinniittunut nunarput sinnerlugu ersarissumik isummagut saqqummiuttarnissaat.
- Uani perifiarfissaq atorluarsimavara Italiamiunut oqariartuutigut isummersuutigullu anngunnissaat. Aammaattaaq nunatsinnut tapersersuinerannut nunat assigiinngitsut sinniisuinut pingaartitsinerput oqariartuutiginissaa pingaaruteqarpoq, tusagassiuutitigut nalunaarummi oqarpoq.
Paavimut immikkut qaaqqusaasoq
Vivian Motzfeldt nunanut allanut tunngasunut naalakkersuisutut USA-p præsidentiata Donald Trumpip Kalaallit Nunaata USA-mit tiguarusunneranik oqariartuuteqartarnerani diplomatiikkut ajornartorsiornerup nalaani pingaarutilimmik inissisimaffeqarsimavoq.
Vivian Motzfeldt Italiamiinnermini ilaatigut Italiap Finlandillu nunanut allanut ministerii naapippai, aamma paavi Leo ilassillugu.
Vivian Motzfeldt Peterspladsimi St. Peterp Basilicap saani paavip sapaatip-akunneranut ataasiarluni oqaloqateqartarneranut immikkut qaaqqusaavoq. Tamatumalu kingorna naalagaffiup Vatikanip nunanut allanut tunngsunut ministeria biskorpiunerlu naapippai.
Paavi Leo USA-miit paavit siullersaraat, 2025-milu maajimi paavi Fransis taarserlugu paavinngorpoq.
