Von der Leyen: Kalaallit Nunaat isumaqatiginninniutigineqarsinnaanngilaq

EU-p kommissioniani siulittaasup Ursula von der Leyenip Davosimi Schweizimiittumi nunarsuaq tamakkerlugu aningaasaqarneq pillugu ataatsimeersuarnermi marlunngornermi oqalugiarpoq.

Oqalugiarnermi naalernera Kalaallit Nunaat eqqaavaa, tassanilu USA-p nunamik tiguaarusulluni tatisinerani EU-p Kalaallit Nunaat Danmarkillu Kunngeqarfia piumasaqaateqanngitsumik tapersersoraa oqaatigalugu.

EU-mi Issittumi isumannaallisaanerup nukittorsarnissaanut suliniuteqartut, Ursula von der Leyen oqarpoq.

- Siullertut Kalaallit Nunaat Danmarkilu tamakkiisumik tapersersorpagut.

- Nunap killeqarfiisa oqartussaaffigineqarnerat isumaqatiginninniutigineqarsinnaanngilaq, Ursula von der Leyen marlunngornermi oqalugiarnermini oqarpoq.

Kalaallit Nunaanni aningaasaliisoqassasoq

EU-miit Kalaallit Nunaanni aningaasaliinerit annertusingaatsiarnissaat sulissutigineqartoq aamma oqaatigaa.

- Danmarki Kalaallit Nunaallu suleqatigalugit nunap aningaasaqarnera attaveqaatillu qanoq tapersersorsinnaanerlugit paasiniassavarput.

EU-p Issittumi isumannaatsuunissaq pillugu USA suleqatiginerulissavaa.

- Tamatta soqutigisaraarput, aningaasaliinerillu annertusissavagut.

Inuiaat oqartussaassusillit siunissartik namminneq aalajangertussaavaat

Europamiut sikusiutinik atortunillu allanik Issittumi isumannaatsuunissamut pingaaruteqartunik sanaartornermut aningaasaliisoqassasoq siunnersuutigaa.

Nunat sumiiffimmi suleqatigisat, tassaasut Tuluit Nunaat, Norge, Island Canadalu, isumannaallisaanikkut suleqatigiinnerunissaat kissaatigaa. Inuiaat oqartussaassusillit siunissartik namminneq aamma aalajangertussaagaat naqissuserpaa.

Ursula Von der Leyenip Donald Trumpip pillaalluni akitsuusersuiniarnera kukkunertut taavaa, ingammik nunat iligisat eqqarsaatigalugit. EU-p Issittumi periusissiaa nutarterneqassasoq aamma oqaatigaa.