Wangenheim: Tartuluttut 118-it nalunaarsorneqaqqapput

Napparsimasut 118-it peqqinnissaqarfimmit tartumikkut katsorsarneqartut saniatigut aamma sakkukitsumik tartuluttoqarpoq malittarineqartunik.

- Nunatsinni tartuluttut katillugit 160-170-it missiliorneqarput, Anna Wangenheim paragraf 37 naapertorlugu Mette Arqe-Hammekenimut Naleqqameersumut apeqqutaanut akissummini allappoq.

Katsorsarneqartut unammilligassallit

Nappaat ilungersunartoq tartulerneqarnissamik pisariaqartitsiffiusunut unammilligassamik nassataqarpoq.
Tartuliinissamut immikkut ilisimasallit amigaataasut pisariaqartinneqarmata Peqqinnissaqarfimmiit neqeroorutigineqarsinnaanngitsoq Anna Wangenheimip erseqqissarpaa. Inuiaqatigiillu taama ikitsigitillugit tartumik timip kingornussisaataanut naleqquttumik nassaartoqarsinnaaneranut periarfissaq annikippallaarpoq.

- Taamatuttaaq tartussarsisoqarsimatillugu tartulersittussap tamatuma pineraniit akunnialuit qaangiutsinnagit pilatsinnissamut piareersimasariaqartussaavoq, ilisimatitsivoq.

Napparsimasut tartulersinnissamut piumasaqaatinik naammassinnittut Danmarkimi suliaritittussaapput.

Danmarkimiissasut

- Timaata kingornussisaataanut naleqquttumik tartussarsinermiit sapinngisamik piaarnerpaamik suliarineqarsinnaaqqullugu Danmarkimiinnissaa pisariaqarluinnarpoq, naalakkersuisoq nassuiaavoq. 

Napparsimasut tartussaminnik ukiorpassuarni utaqqisariaqartarnerat pakatsinarsinnaavoq. Napparsimanermik saniatigut Danmarkimi najugaqartariaqartarput.

Tartulersinneq suliaritittup qanoq issusia suliarineqarneratalu ingerlarnga apeqqutaallutik 267.932 koruunit aamma 392.264 koruunit akornanni akeqartoq Anna Wangenheim erseqqissaavoq.

- Suliarineqarnerup saniatigut allanik soorlu katsorsartittup angalaneranut, katsorsartittut illuaniinneranut inuuneratalu sinnerani pisassaanik allanngorartorujussuusinnaasartunik nakorsaasiinermut aamma aningaasartuuteqarfiusarpoq, paasissutissiivoq.