Zelenskyj: Qujamasuutigaarput paasissutissanik USA uagutsinnut avitseqatiginneqqittalermat

Uraine-p præsidentia naapertorlugu USA paasissutissanik avitseqatigiittarnermik unitsitsigallarsimagaluariarluni maanna Ukrainemut avitseqatiginnittaleqqissimavoq.

- Piffissap ilaa mattussisoqarpoq (blokering, aaqq.). Tamatuma kingorna mattussineq amerikap tungaaniit atorunnaarseqqinneqarpoq. Tamanna assut qujamasuutigaarput. Avitseqatigiittarnerput pissusissamisut maanna ingerlaqqilerpoq, præsident Volodymyr Zelenskyj NBC-mit apersorneqarluni taamak ilisimatsitsoq AFP allaaserinnippoq.

USA-mit paasissutissanik pissarsisinnaanngitsilluni Ukraine qajannartumik inissisimavoq qaartartut ballistiske missilit Ruslandimit igeriunneqartartut eqqarsaatigalugit.

NBC News allappoq, USA ulluni arlalinni Ukrainemut paasissutissanik avitseqatiginnittarnerminik uninngatitsisimasoq, taamaalilluni Ukraine qaartartunik taakkuninnga igeriussiffigineqaraangami arajutsisarsimalluni.

Marlunngornermi unnukkut Zelenskyj X-mi allappoq, Ukrainep illoqarfiisa pingaarnersaanni Kyiv-imi nukissiorfissuaq kiassarnermut atortoq Rulandimit ballistiske missilinik eqqorneqarsimasoq.

Præsidenti naapertorlugu saassussineq pisimavoq Ukrainep iligisaata mianersoqqusinngitsoornerisigut Ukrainemit arajutsineqarluni.

AFP naapertorlugu Ukraine-p pinngitsoorsinnaanngilaa nunanit killernit iligisaminit paasissutissanik pissarsinissaq – pingaartumik aamma USA-mit – qaartartunik igeriussiffigitinnermini sapinngisamik siusissukkut qisuariarsinnaassaguni paasissutissat pisariaqartilluinnaramigit.

RITZAU