75 procentimik tulaassisussaatitaaneq isornartorsiorneqartoq

Aalisarnermut inatsit nutaaq januarip aallaqqaataani 2025 aallarnerfigalugu atuutilersoq nunatsinnilu aalisarnermik inuussutissarsiuteqarnerup nutaamik aaqqissuussaaneranut tunngaviliisuusimasoq ukioq ataasinngortorsiulerpoq.

Aalisarnermut inatsit arlalitsigut pitsaaqutitaqartoq, kisiannili ataasiakkaanik pingaarutilinnilli aaqqitassaqartoq aalisartut piniartullu kattuffii marluk, Kalaallit Nunaanni Aalisartut Piniartullu Kattuffiat, KNAPK, aamma Sinerissap Qanittuani Aalisartut Piniartullu Kattuffiat, SQAPK isumaqarput.

Allanngortinneqartariaqartoq

Naalakkersuisut naapertorlugit aalisarnermi pisuussutit sapinngisamik ukiut tamaasa atorluarneqartariaqarput, taamaammallu PNNP (Pisassiissutit niuerutigineqarsinnaasut Nammineq Pigisat) naapertorlugu aalisarnermi 75 procentimik tulaassisussaatitaaneq pisussaaffeqarneq aalisarnermut inatsimmi nutaami atuutilersinneqarpoq.

Tassa imaappoq aalisartup ukiumut pisassiissutit minnerpaamik 75 procentii aalisartariaqarpai, ukiunilu pingasuni tulleriinni 75 procentiinik aalisarsimanngikkaanni inatsit naapertorlugu pisassiissutigineqartut nalimmassarneqassapput, taamaaliortoqanngikkunillu pisassiissutit atorneqarsinnaanngitsut Naalakkersuisunit tiguneqarlutik pisariaqartitsisunut neqeroorutigineqartassapput.

Aalisarnermi inatsimmi immikkoortortaq taanna aalisartunit PNNP-mik aaqqissuussinermut nuussimasunit paatsuungassutigineqarsimasoq sinerissap qanittuani aalisartunut piniartunullu siunnersuisarfimmi, KONFIFA-mit siusinnerusukkut Sermitsiamut oqaatigineqarpoq.

Inatsillu pineqartoq pissutsinut atuuttunut nalimmassarneqanngippat aalisartut ilaannut ajorluinnartumik kinguneqarsinnaasoq, aalisartut kattuffii isumaqarput.

Piffissaliussaq sivikippallaartoq

Aalisarnermut inatsisip atuutilersinneqarnerata kingorna sinerissap qanittuani aalisartunut piumasaqaatit assigiinngitsut naammassineqarnissaat qulakkeerniarlugu, aalisartut piniartullu peqatigiiffiisa, minnerunngitsumillu KNAPK-p, piffissaq sivisooq atorsimagaat, KNAPK-p siulittaasua Pele Blytmann oqarpoq.

- Isorliunerusuni MitId-mik atuisinnaanngitsut qallunaatullu paasisinnaanngitsut, kiisalu naqinnernik ilisarinnissinnaanngitsut piumasaqaatinik naammassinninnissaat qulakkeerniarlugu piffissaq sivisooq aalisartunik sullissinermut atortariaqarsimavarput. Piffissap sivikitsuinnaap iluani piumasaqaatinik naammassinnittoqarnissaa piumasaqaataavoq, kisiannili ajornartorsiutit uani taaneqartut eqqumaffigineqarsimanngillat.

- Ukioq naalerpoq piumasaqaatinillu amerlaqisunik naammassinninnissamut piffissaliussap sivikippallaarnera pissutaalluni suliat arlallit suli ingerlapput.

Ajornartorsiutinngorsinnaasoq

Aqutsiveqarfik 47-mi PNNP naapertorlugu aalisarnermi ukiumut 75 procentimik aalisartussaatitaanermik pisussaaffeqarneq aalisartunut arlalinnut annertuumik ajornartorsiutinngorsinnaanera KNAPK-miit ernummatsigineqarpoq.

- Ukioq manna sinerissami sumiiffinni amerlasuuni saarullippassuaqarpoq tunisinermilu akit qaffasipput, tamannalu pissutaalluni PNNP naapertorlugu qaleralinniarlutik aalisartut amerlasuut maanna saarullinniarput.

- Tamatumalu kingunerisaanik qaleralinniarluni aalisarnermi pisassiissutit 75 procentiinik aalisartussaatitaanermik pisussaaffeqarneq amerlasuut naammassisinnaanngilaat, taamaattoqassappallu taakku pisassaatiminnik arsaarneqassapput. Tamanna akuersaarneqarsinnaanngilaq, Pele Blytmann oqarpoq.

Aalisakkat suut takkusimaarnerat aallaavigalugu aalisarneq ingerlanneqartarmat, 75 procentimik aalisartussaatitaanermut tunngasoq aalisarnermut inatsimmi naleqqussarneqartariaqartoq, KNAPK-p siulittaasua isumaqarpoq.

Akerlianik pisoqartoq

SQAPK-mi siulittaasup Anthon Lindenhannip, KNAPK assigalugu PNNP naapertorlugu aalisarnermi 75 procentimik aalisartussaatitaanermik pisussaaffeqarneq isornartorsiorpaa.

- Pineqartoq pillugu allannguisoqarnissaa kissaatigisimagaluarparput, kisiannili maannakkumut tamanna pisimanngilaq, tamannalu soorunami ajuusaarnarpoq.

- Aalisarnermut inatsit ataatsimut isigalugu iluatsittutut oqaatigineqarsinnaavoq, kisianni piumasaqaatit ilai, soorlu 75 procentimik aalisartussaatitaanermut tunngasut, aalisartut atugaannut naleqqussarneqartariaqarpoq, taanna oqarpoq.

Umiatsiaararsortunut PNNP eqqunneqarneratigut toqqissisimanerusumik aalisartoqarnissaa ilaatigut siunertaavoq, kisiannili pisassiissutit pigisat nungupallanniarlugit aalisarneq maanna ingerlanneqartoq, tamannalu pissusissamisuunngitsoq, Anthon Lindenhann isumaqarpoq.