Suliffeqarfissuaq tunisassiornermik, tuniniaanermik, avammut niuernermik suliaqartoq Polar Seafood Denmark A/S kalaallinit tamakkiisumik pigilerneqassaaq.
Kalaallit aalisarnermik ingerlatseqatigiiffissuat Polar Seafood Greenland A/S, Islandimi aalisarnermik ingerlatseqatigiiffissuup Brim hf-ip, danskit suliffeqarfiutaanni piginneqataassusaata 50 procentiisa pisiarinissaannut piumasaqaatitalimmik isumaqatigiissuteqarfigaa.
Suliffeqarfissuaq tunisassiornermik, tuniniaanermik, avammut niuernermik suliaqartoq Polar Seafood Denmark A/S kalaallinit tamakkiisumik pigilerneqassaaq.
Kalaallit aalisarnermik ingerlatseqatigiiffissuat Polar Seafood Greenland A/S, Islandimi aalisarnermik ingerlatseqatigiiffissuup Brim hf-ip, danskit suliffeqarfiutaanni piginneqataassusaata 50 procentiisa pisiarinissaannut piumasaqaatitalimmik isumaqatigiissuteqarfigaa.
Niuerneq 925 millionit koruuninik naleqarpoq. Brimimit, Islandimi børsimi nalunaarsorneqartumit, tamanna nalunaarutigineqarpoq.
Ajornannginnerusumik aajangiisinnaassuseqalissasoq
Isumaqatigiissummi piumasaqaatit eqqortinneqarpata, suliffeqarfik tunisassiornermik, tuniniaanermik avammullu niuernermik suliaqartoq Polar Seafood Denmark Kalaallit Nunaanneersunit Polar SeafoodGreenlandimit pigineqalissaaq.
Brimimik isumaqatigiissuteqarneq periusissiaq malillugu aammalu piginnittut eqqarsaatigalugit, tamakkiisumik najugaqartunit ingerlanneqalernermigut, suli nukittunerulerlunilu ajornannginnerusumik aalajangiisinnaassuseqalissasoq, Polar Seafood Greenland aqutsisuisa oqaatigaat.
- Isumaqatigiissutip uuma nassataanik piginnittuuneq ataatsimoorfiulerpat suleriutsit ajornaannerulersinneqassapput. Aalajangiiniarnerit piaarnerusumik naammassineqartalissapput, nunatsinnilu sorlaqarnerput tunngavigalugu suli eqarfissuup pigisatta ineriartortinnissaanut periarfissat pitsaanerulissapput, pisortaq Bent Salling oqarpoq.
Kalaallit soqutigisaaq qulakkeerniarneqartut
Tamakkiisumik piginnittuulernikkut Polar Seafood Greenlandip, aalajangiinissat assigiinngitsut, soorlu aalisarnermut aamma tunisassiassanut, nunatsinnilu soqutigisaqaqatitsinnut ass. SISA, Polar Seafood Greenlandimik procentinik tallimanik piginneqataasumut tunngassutillit, nunatsinnit aalajangiiffigineqartalernissaat qulakkeerneqassaaq.
- Siunnerfipput ersarinnerulerlunilu nunatsinni naleqartitat tunngavigalugit, tassa aalisarneq sulisugullu eqqarsaatigalugit, ingerlatsinerput suli nukittunerulissaaq.
- Ilutigalugulu Danmarkimi suli immik ingerlataqarnerput nukittorsarneqassaaq, suliffeqarfiullu taassuma aqunneqarnerata aammalu pingaarnersiuinerup nunatsinnit ingerlanneqarnera ersarinnerulissaaq, pisortaq Miki Jonas Brøns oqarpoq.
Brimip piginneqataaffiisa pisiarinissaannik aalajangerneq pisortat naapertorlugit ullutsinnut naleqqunnerusumik pisariakinnerusumillu suleriuseqarnikkut siunissaq ungasinnerusoq eqqarsaatigalugu, piginnittut nunatsinneersut suliffeqarfissuup ineriartornissaanik kissaateqarnerat piviusunngortinniarneqarpoq.
Polar Seafoodip Grenlandip tamakkiisumik piginnittuulernerat sukkasuumik ataqatigiissumillu aalajangiisinnaasoqalissaaq.
- Piginnittut ataatsimoortilernerisigut suli nukittunerulissaagut. Aningaasaliissuteqarnissanut aammalu siunissaq ungasissoq eqqarsaatigalugu nunatsinni nunallu tamalaat akornanni ineriartortitsinissamut periarfissagut pitsaanerulissapput, Bent Salling oqarpoq.
Soraarnerussutiassanut aningaasaateqarfik ikinnerussuteqarluni piginneqataasoq
Polar Seafood Denmark A/S-imi, Jyllandip avannaani Vodskovimi qullersaqarfeqartumi, pappiaqqat naleqartut (aktie aaqq.) affaat Brimip qallunaat ingerlatseqatigiiffiutaat S-13 Holding ApS aqqutigalugu pigivai. Tuniniaanerput avammullu niunermut suliffeqarfiup sinnera kalaallinit pigineqarpoq.
Polar Seafood Greenland aningaasaatilissuarnit Bent Sallingimit, Laila Friis-Sallingimit Miki Brønsimillu piginneqataaffigineqarpoq, sulisartullu kattuffiata SIK-p soraarnerussutisiassanut aningaasaateqarfiata SISA ikinnerussuteqarluni piginneqataassuteqarpoq.
Kalaallit Nunaanni aalisarnermik ingerlatsiviit namminersortut annersaat Polar Seafood Denmark, Brimip piginneqataaneranik pisinermigut Europap avannaani aalisarnermik inuussutissarsiuteqarnermi inissisimaffimminik nukittorsaasoq qularutissaanngilaq.
Polar Seafood Denmark aningaasaqarnikkut nukittullunilu ingerlalluartuusoq, siorna aatsaat taama annertutigisunik sinneqartooruteqarpoq. Akileraarutit ilanngaatigereerlugit 172 millionit koruuninik iluanaaruteqarpoq. Ingerlatseqatigiiffiup 2025-mi nammineq aningaasaatai 1,1 milliardiupput.
Aalisarnermut tunngatillugu pissaanilissuaq Gudmundur Kristjansson siuttoralugu, Brimip Polar Seafood Denmarkip affaa oktobarimi 2022-mi danskinit ilaqutariinnit Bent Norman Pedersenimit aamma Helge Nielsenimit 625 millionit koruunilerlugu pisiaraa.
Taamaalilluni Polar Seafood Greenland, Brimip Polar Seafood Denmarkimi piginneqataaneranut 300 millionit koruuninik annertunerusunik akiliivoq, Brimip Polar Seafood Denmarkip affaanik 2022-mi pisineranit akisunerusumik.
Tamanna Polar Seafood Denmarkip ukiuni pingasuni sinneqartoorutaanut naleqqiunneqarsinnaavoq.
Iluanaaruteqarluarnartoq
Polar Seafood Denmark suliffeqarfiuvoq ingerlalluartoq, ukiuni arlalinni aningaasatigut angusarissaarluartuusoq.
Ingerlatseqatigiiffik siorna 4,7 milliardit koruuninik kaaviiaartitaqarpoq, akileraarutillu ilanngaatigereerlugit 172 millionit koruuninik sinneqartoorluni. Ingerlatseqatigiiffik 2021-miilli aatsaat taama angusarissaartigaaq. Ingerlatseqatigiiffiup taama angusarissaartigineranut aalisakkat akiisa qaffasinnerat pissutaaqataalluinnarpoq.
